ნეპალში მასშტაბური წყალდიდობის შემდეგ სამაშველო ოპერაცია გრძელდება. განსაკუთრებული ყურადღება ჰიდროელექტროსადგურების პროექტებზე, მათ შორის Trishuli-3A-ზეა გამახვილებული, სადაც გვირაბებში ასობით ადამიანი შესაძლოა იყოს ჩარჩენილი. ინფორმაციას BBC ავრცელებს.
ოფიციალური პირების განცხადებით, სამაშველო ჯგუფები, მათ შორის ჩინეთიდან და ინდოეთიდან ჩასული სპეციალისტები, გვირაბებში მყოფ ადამიანებთან დაკავშირებას ცდილობენ, თუმცა ამ დროისთვის მათგან პასუხი არ მიუღიათ.
გავრცელებული ინფორმაციით, დაკარგულთა შორის ასობით ადამიანი ნეპალის ჰიდროელექტროსადგურების თანამშრომელია.
ადგილობრივი ხელისუფლების ბოლო მონაცემებით, ოთხშაბათს მომხდარი კატასტროფის შედეგად ნეპალში სულ მცირე 903 ადამიანი დაიღუპა, ხოლო 4 200 ადამიანი დაკარგულად ითვლება.
სტიქიამ მეზობელი ტიბეტიც დააზარალა. ჩინეთის სახელმწიფო მედიის ინფორმაციით, იქ 16 ადამიანის დაღუპვაა დადასტურებული, 546 ადამიანი კი დაკარგულად ითვლება.
ჩიტვანის რაიონში ხელისუფლებამ განაახლა იმ ადამიანების დაკრძალვა, რომელთა იდენტიფიცირებაც ვერ მოხერხდა და რომელთა ცხედრებიც წყალმა ნაპირზე გამორიყა. ოფიციალური პირები გარდაცვლილების დნმ-ის ნიმუშებს ინახავენ, რათა მოგვიანებით ისინი ოჯახის წევრების დნმ-ს შეადარონ და მათი ვინაობა დაადგინონ.
აღმოჩენილი 272 ცხედრიდან თითქმის 200 უკვე დაკრძალეს. ხელისუფლება იმედოვნებს, რომ დარჩენილი ამოუცნობი ცხედრების დაკრძალვა დღეს დასრულდება.
