„ნაციონალური მოძრაობის“ ერთ-ერთი ლიდერი, პატიმრობაში მყოფი ლევან ხაბეიშვილი ოპოზიციურ ძალებს გაერთიანებისა და ქვეყნის მასშტაბით დაახლოებით 2 500 საარჩევნო უბანზე 15-20-კაციანი ჯგუფების შექმნისკენ მოუწოდებს. ამის შესახებ ნათქვამია მის მიერ ციხიდან გამოგზავნილ წერილში, რომელიც სოციალურ ქსელში გამოქვეყნდა.
ხაბეიშვილის განცხადებით, ხელისუფლებაზე ზეწოლისა და „ნორმალური საარჩევნო გარემოს“ მისაღწევად საჭიროა 30-40 ათასი აქტიური მხარდამჭერისგან შემდგარი ორგანიზებული ქსელის შექმნა.
„საჭიროა ფორმულა — ყველა (!) მინუს ივანიშვილი. ერთად შევძლებთ ამ „არმიის“, 30 000-40 000-იანის შექმნას?! — ცხადია, კი! ამას თუ გავაკეთებთ, ორგანიზებულს გავხდით ამ გათითოკაცებულ მებრძოლებს, მაშინ შევძლებთ წნეხს, შეტევას და მივიღებთ სამართლიან არჩევნებს, სადაც დემოკრატიული ძალები გაიმარჯვებენ“, — წერს ხაბეიშვილი.
მისი შეფასებით, ცალკეულ ოპოზიციურ პარტიებს ქვეყნის ყველა საარჩევნო უბანზე სათანადო ინფრასტრუქტურის შექმნის რესურსი არ გააჩნიათ, გაერთიანების შემთხვევაში კი თითოეულ უბანზე 15-20 აქტივისტის მობილიზება შესაძლებელია.
„თუ უბანში 15-20 ადამიანი არ გვყავს, ვინც მუშაობს ხალხთან, ავრცელებს სიმართლეს, იცავს ხმებს, აკეთებს მობილიზებას, მაშინ უბრალოდ აზრი არა აქვს ბაქიბუქს“, — აცხადებს ხაბეიშვილი.
მისივე თქმით, ოპოზიციურმა პარტიებმა ერთმანეთში უნდა გაინაწილონ საარჩევნო უბნები და ადგილზე შექმნან გუნდები. ხაბეიშვილი აცხადებს, რომ ციხიდანაც შეძლებს რამდენიმე უბანზე მსგავსი ჯგუფების ორგანიზებაში მონაწილეობას.
წერილში ის აკრიტიკებს იმ ოპოზიციურ პარტიებსა და პოლიტიკოსებსაც, რომლებიც ერთიანობის იდეას არ იზიარებენ და დამოუკიდებლად მოქმედებას ამჯობინებენ.
„ძალა ერთობაშია და ამას პრაქტიკაში უნდა ხორცის შესხმა... დაეშვით მიწაზე და რეალურ მობილიზებაზე ვკონცენტრირდეთ! ტყუილად დროის გაწელვის გარდა, არაფერი ხდება თქვენის მხრიდან“, — წერს ხაბეიშვილი.
მისი განცხადებით, მზად არის გაერთიანებულ ოპოზიციურ პროცესში პირადი პოლიტიკური ამბიციები გვერდზე გადადოს.
„მე თქვენსკენ ვარ! უკანასკნელი ვიქნები თქვენში, თქვენი მსახური ვიქნები... ძალის ეშინია ივანიშვილს, საქმე და ძალა, რაც არის, მოგახსენეთ. უაზრო ლაი-ლაი არ აშინებს რეჟიმს!“ — აცხადებს ლევან ხაბეიშვილი.
