აშშ-ის არმიის მდივანი დენ დრისკოლი თანამდებობას ტოვებს. ინფორმაციას Associated Press თეთრ სახლზე დაყრდნობით ავრცელებს.
თეთრი სახლის პრესმდივნის, ანა კელის განცხადებით, დრისკოლმა მნიშვნელოვანი როლი შეასრულა პრეზიდენტ დონალდ ტრამპის დღის წესრიგის არმიის დეპარტამენტში განხორციელებაში.
„მდივანი დრისკოლი ეფექტურად უწყობდა ხელს პრეზიდენტ ტრამპის დღის წესრიგის არმიის დეპარტამენტში გატარებას, ისტორიული სამხედრო ოპერაციების დროს ლიდერობით, ლეტალურობის აღდგენით, ასევე რუსეთსა და უკრაინას შორის მოლაპარაკებების ხელშეწყობით. მისი მუშაობის დამსახურებით, მთავარსარდალთან და ომის მდივანთან ერთად, აშშ-ის არმია ახლა უფრო ძლიერია, ვიდრე ოდესმე“, — განაცხადა კელიმ.
Associated Press-ის ინფორმაციით, დრისკოლის წასვლას წინ უძღოდა დაძაბულობა აშშ-ის თავდაცვის მდივან პიტ ჰეგსეთთან. უთანხმოება, მედიის ცნობით, შეიარაღებულ ძალებში მაღალი რანგის სამხედრო პირების გათავისუფლებას უკავშირდებოდა.
აშშ-ის არმიის წარმომადგენლის განცხადებით, დრისკოლი დონალდ ტრამპს არმიაში არსებულ ვითარებაზე ესაუბრა, რის შემდეგაც გადადგომის შესახებ განცხადება წარადგინა.
წყაროების ცნობით, უახლოეს დღეებში თანამდებობის დატოვებას დრისკოლის მოადგილე დეივ ფიცჯერალდიც გეგმავს.
თეთრ სახლს დრისკოლის შემცვლელის ვინაობა ჯერჯერობით არ დაუსახელებია.
