დევდორაკში დამონტაჟებული ადრეული გაფრთხილების სისტემიდან სასიგნალო შეტყობინების მიღების შემდეგ, სასაზღვრო გამშვები პუნქტი „დარიალიდან“ მოქალაქეებისა და თანამშრომლების ევაკუაცია განხორციელდა. ინფორმაციას შინაგან საქმეთა სამინისტრო ავრცელებს.
უწყების ცნობით, სისტემა კალაპოტში დინების მინიმალური აწევის შემთხვევაშიც აფიქსირებს ცვლილებას. შეტყობინების მიღების შემდეგ, დადგენილი პროტოკოლის შესაბამისად, უსაფრთხო ადგილზე გადაიყვანეს როგორც გამშვებ პუნქტზე მყოფი მოქალაქეები, ისე საპატრულო პოლიციის, საბაჟო სამსახურის, სასაზღვრო პოლიციისა და კერძო კომპანიის თანამშრომლები.
„ამავდროულად, პრევენციის მიზნით, სოფელ გველეთთან ყველა სახის ავტოსატრანსპორტო საშუალებისთვის ორივე მიმართულებით მოძრაობა შეზღუდულია“, - ნათქვამია შინაგან საქმეთა სამინისტროს განცხადებაში.
