საფრანგეთის პრეზიდენტი ემანუელ მაკრონი არ გამორიცხავს, რომ გერმანიის ლაიფციგის აეროპორტში მომხდარის მსგავსი თავდასხმა საფრანგეთშიც განხორციელდეს. ამის შესახებ მან ფრანგულ ტელეარხთან ინტერვიუში განაცხადა.
ლაიფციგის აეროპორტში მომხდარ ინციდენტზე დასმული კითხვის საპასუხოდ მაკრონმა აღნიშნა, რომ საფრანგეთში მსგავსი თავდასხმა არ მომხდარა, თუმცა ასეთი საფრთხე არსებობს.
„პასუხია კი. რუსეთი ევროპას უკრაინის სტრატეგიულ სიღრმედ განიხილავს. წლებია თავდასხმის ქვეშ ვართ ყველა ფრონტზე. ბოლო კვირების განმავლობაში დაძაბულობა იზრდება“, - განაცხადა საფრანგეთის პრეზიდენტმა.
მაკრონს ასევე ჰკითხეს ესპანური გამოცემა El Mundo-ს მიერ გავრცელებულ ინფორმაციაზე, რომლის თანახმადაც, აშშ-ის ცენტრალურმა სადაზვერვო სააგენტომ (CIA) საფრანგეთის წინააღმდეგ რუსული დრონებით შესაძლო თავდასხმის შესახებ გაფრთხილება გაავრცელა.
საფრანგეთის პრეზიდენტმა ეს ინფორმაცია უარყო.
„ამ ინფორმაციის უარყოფა შეგვიძლია. CIA-ს ფრანგული სპეცსამსახურებისთვის ასეთი თავდასხმის შესახებ არ შეუტყობინებია“, - განაცხადა მაკრონმა.
ამასთან, მან აღნიშნა, რომ ვითარება სულ უფრო იძაბება და შეშფოთებას იწვევს.
