თავდაცვის სამინისტროს კუთვნილი დიდი ოდენობით თანხის გაფლანგვის საქმეზე მსჯავრდებულებმა, თავდაცვის ყოფილი მინისტრის ჯუანშერ ბურჭულაძის ცოლის ძმამ, ვასილ მხეიძემ და თავდაცვის მინისტრის ყოფილმა მოადგილემ, გიორგი ხაინდრავამ, №12 პენიტენციური დაწესებულება დატოვეს.
მათ საპატიმროსთან ოჯახის წევრები და ახლობლები დახვდნენ. შესაბამის ფოტოს „ტვ პირველი“ ავრცელებს.
თავდაცვის სამინისტროს თანხების გაფლანგვის საქმეზე პირველი ინსტანციის სასამართლომ ჯუანშერ ბურჭულაძეს 10 წლით, ხოლო ვასილ მხეიძესა და გიორგი ხაინდრავას 8-8 წლით თავისუფლების აღკვეთა მიუსაჯა.
სააპელაციო სასამართლოში საპროცესო შეთანხმების საფუძველზე სამივე მსჯავრდებულს სასჯელი შეუმცირდა. ბურჭულაძისა და მხეიძის შემთხვევაში შეთანხმების საფუძველი დანაშაულის აღიარება და გამოძიებასთან თანამშრომლობა გახდა. მათ ყოფილი პრემიერ-მინისტრის, ირაკლი ღარიბაშვილის წინააღმდეგ მიმდინარე ახალ სისხლის სამართლის საქმეზე ჩვენებები მისცეს.
კერძოდ, ბურჭულაძის ჩვენების თანახმად, ქრთამის სახით მიღებული 1 500 000 ლარიდან 750 000 ლარი თავად დაიტოვა, ხოლო დარჩენილი 750 000 ლარი ირაკლი ღარიბაშვილს პირადად გადასცა.
საპროცესო შეთანხმებით, ჯუანშერ ბურჭულაძეს სასჯელად 5 წლით თავისუფლების აღკვეთა განესაზღვრა, საიდანაც 3 წელს პენიტენციურ დაწესებულებაში მოიხდის, ხოლო 2 წელი პირობით ჩაეთვლება. მას ასევე 1 მილიონი ლარის ჯარიმა დაეკისრა.
ვასილ მხეიძესა და გიორგი ხაინდრავას სასჯელად 4 წლითა და 2 თვით თავისუფლების აღკვეთა განესაზღვრათ, საიდანაც 1 წელი და 2 თვე პენიტენციურ დაწესებულებაში უნდა მოეხადათ, ხოლო 3 წელი პირობით ჩაეთვალათ. თითოეულ მათგანს 100 000 ლარის ჯარიმაც დაეკისრა.
