პროკურატურასა და 4 ოქტომბრის საქმეზე მსჯავრდებულ მურთაზ ზოდელავასა და ლაშა ბერიძეს შორის საპროცესო შეთანხმების პირობები საბოლოო შეთანხმების პროცესშია. „ინტერპრესნიუსის“ ინფორმაციით, საუბარია ორივე მსჯავრდებულისთვის რეალური სასჯელის ერთი წლითა და ერთი თვით განსაზღვრაზე.
თუ საპროცესო შეთანხმება აღნიშნული პირობით გაფორმდება და დამტკიცდება, მურთაზ ზოდელავა და ლაშა ბერიძე პენიტენციურ დაწესებულებას 4 ნოემბერს დატოვებენ.
ცნობისთვის, თბილისის საქალაქო სასამართლოს განაჩენით, 2025 წლის 4 ოქტომბრის მოვლენებთან დაკავშირებულ საქმეზე ლაშა ბერიძესა და მურთაზ ზოდელავას 7-7 წლით თავისუფლების აღკვეთა აქვთ მისჯილი.
მურთაზ ზოდელავას ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით ჰქონდა წარდგენილი, რაც ჯგუფურად ჩადენილ სტრატეგიული და განსაკუთრებული მნიშვნელობის ობიექტების ხელში ჩაგდებისა და ბლოკირების მცდელობას გულისხმობს. მას ბრალად ედებოდა ასევე სსკ-ის 225-ე მუხლის პირველი ნაწილით გათვალისწინებული დანაშაული, ჯგუფური ძალადობის ორგანიზება და ხელმძღვანელობა, ასევე სსკ-ის 317-ე მუხლით გათვალისწინებული დანაშაული, საქართველოს კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდება.
ლაშა ბერიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის „ა“ ქვეპუნქტით ჰქონდა წარდგენილი, რაც ჯგუფურად ჩადენილ სტრატეგიული და განსაკუთრებული მნიშვნელობის ობიექტების ხელში ჩაგდებისა და ბლოკირების მცდელობას გულისხმობს. მას ასევე ბრალად ედებოდა სსკ-ის 225-ე მუხლის პირველი ნაწილით გათვალისწინებული ჯგუფური ძალადობის ორგანიზება და ხელმძღვანელობა.
