როგორც ჰერჩინსკიმ ჟურნალისტებთან საუბრისას აღნიშნა, საქართველო ევროკავშირის საგარეო საქმეთა მინისტრების განხილვის საგანი რეგულარულად ხდება, რაც ქვეყანაში მიმდინარე მოვლენებით არის განპირობებული.
„აშკარად შეშფოთებულები ვართ თქვენს ულამაზეს ქვეყანაში მოვლენებით. შეშფოთებულები ვართ ადამიანის უფლებების მხრივ არსებული ვითარების გაუარესებით, შეშფოთებულები ვართ დემოკრატიის მდგომარეობით“, – განაცხადა ელჩმა.
ჰერჩინსკიმ ყურადღება გაამახვილა მოქალაქეების დაკავებებსა და სამოქალაქო თავისუფლებების შეზღუდვაზე. მისი შეფასებით, განსაკუთრებით პრობლემურია ვითარება, როდესაც ადამიანები ტროტუარზე დგომისა და სოციალურ ქსელებში გამოქვეყნებული მოსაზრებების გამო თავისუფლების აღკვეთის საფრთხის წინაშე დგებიან.
„ძალიან კარგად იცით, რომ დღევანდელ საქართველოში ხალხი ციხეში მიდის ტროტუარზე დგომისთვის. ხალხი ციხეში მიდის „ფეისბუქზე“ პოსტებისთვის“, – აღნიშნა ევროკავშირის ელჩმა.
დიპლომატი ასევე გამოეხმაურა საქართველოში ევროკავშირისა და მისი წევრი სახელმწიფოების მიერ დაფინანსებული ორგანიზაციების საქმიანობის შეზღუდვას.
მისი განცხადებით, ფონდები, რომლებიც წლების განმავლობაში საქართველოს სუვერენიტეტის განმტკიცებასა და ქვეყნის განვითარებას უწყობდნენ ხელს, დღეს საქართველოდან იდევნებიან.
„ევროკავშირისა და წევრი სახელმწიფოების ფონდები, რომლებიც ყოველთვის უჭერდნენ მხარს საქართველოს სუვერენიტეტსა და განვითარებას, საქართველოდან იდევნებიან. ეს, რა თქმა უნდა, უკიდურესად პრობლემურია“, – განაცხადა ჰერჩინსკიმ.
ელჩის თქმით, სწორედ აღნიშნული გარემოებები განაპირობებს ევროკავშირის საგარეო საქმეთა მინისტრების დღის წესრიგში საქართველოს საკითხის კვლავ შეტანას.
„კიდევ ერთხელ, შემდეგ ორშაბათს მინისტრები განიხილავენ საქართველოში ვითარების გაუარესებას“, – აღნიშნა პაველ ჰერჩინსკიმ.
ევროკავშირის საგარეო საქმეთა მინისტრების შეხვედრა 12 ოქტომბერს გაიმართება.
