საქართველოს ხელისუფლების წარმომადგენლები ევროკავშირის გაფართოების ფორუმის დადასტურებულ გამომსვლელთა შორის არ არიან. ფორუმი სახელწოდებით „უფრო ფართო ევროპა - უფრო ძლიერი ევროპა“ 15–16 ნოემბერს გაიმართება.
გამომსვლელთა სია ევროკომისიის ოფიციალურ ვებგვერდზე გამოქვეყნდა. ღონისძიებაში მონაწილეობას ევროკავშირის ხელმძღვანელი პირები და გაერთიანების გაფართოების პროცესში მონაწილე ქვეყნების ლიდერები მიიღებენ, თუმცა საქართველოს ხელისუფლების წარმომადგენლები სიაში არ ფიგურირებენ.
ფორუმის დადასტურებულ გამომსვლელებს შორის არიან ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიო კოშტა, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი და გაფართოების საკითხებში ევროკომისარი მარტა კოსი.
ღონისძიებაზე სიტყვით გამოსვლა ასევე დაგეგმილი აქვთ ევროკავშირში გაწევრიანების მსურველი ქვეყნების ლიდერებს, მათ შორის მოლდოვის პრეზიდენტ მაია სანდუს, უკრაინის მთავრობის წარმომადგენელს სერგეი კორეცკის, ალბანეთის პრემიერ-მინისტრ ედი რამას, მონტენეგროს პრემიერ-მინისტრ მილოიკო სპაჟიჩსა და ჩრდილოეთ მაკედონიის პრემიერ-მინისტრ ჰრისტიან მიცკოსკის.
მანამდე გამოცემა „ევროსკოპი“ საკუთარ წყაროზე დაყრდნობით ავრცელებდა ინფორმაციას, რომ საქართველოს ხელისუფლებას ევროკავშირის გაფართოების ფორუმზე მიწვევა არ მიუღია.
ევროკომისიის მიერ გამოქვეყნებულ გამომსვლელთა სიაში საქართველოს ხელისუფლების წარმომადგენლების არყოფნა ამ ინფორმაციას შეესაბამება, თუმცა მხოლოდ სია ოფიციალურად არ ადასტურებს, რომ საქართველოს წარმომადგენლები ღონისძიებაზე საერთოდ არ მიუწვევიათ.
ფორუმი ევროკავშირის გაფართოების პოლიტიკას, კანდიდატი ქვეყნების ევროპული ინტეგრაციის პერსპექტივებსა და გაერთიანების მომავალს დაეთმობა.
საქართველოს ხელისუფლების წარმომადგენლების არყოფნის საკითხი განსაკუთრებით საყურადღებოა ევროკავშირსა და საქართველოს ხელისუფლებას შორის ურთიერთობების გაუარესების ფონზე. ევროკავშირის წარმომადგენლები ბოლო პერიოდში არაერთხელ აკრიტიკებდნენ საქართველოში მიღებულ კანონებსა და პოლიტიკურ პროცესებს, რომლებიც, მათი შეფასებით, ქვეყნის ევროპულ ინტეგრაციას აფერხებს.
საქართველოს ევროკავშირის კანდიდატი ქვეყნის სტატუსი 2023 წლის დეკემბერში მიენიჭა, თუმცა ევროკავშირის ინსტიტუტების შეფასებით, შემდგომმა პოლიტიკურმა განვითარებამ ქვეყნის გაწევრიანების პროცესი ფაქტობრივად შეაჩერა.
წყარო: ევროკომისია — EU Enlargement Forum 2026
