ამის შესახებ ოქიტაშვილი სოციალურ ქსელში გამოქვეყნებულ ვრცელ განცხადებაში წერს და ყოფილ მინისტრს რამდენიმე კითხვით მიმართავს.
მისი მტკიცებით, რუხაძის მინისტრობის პერიოდში კულტურის პალატა არაერთ წინააღმდეგობას წააწყდა, რაც, ოქიტაშვილის შეფასებით, ორგანიზაციის საქმიანობის შეზღუდვასა და პირადად მის იზოლაციას ემსახურებოდა.
„თქვენი მინისტრობის პერიოდში საქართველოს კულტურის პალატა და პირადად მე, როგორც მისი ხელმძღვანელი, არაერთი წინააღმდეგობის წინაშე აღმოვჩნდით. მიმაჩნია, რომ ეს იყო მიზანმიმართული მოქმედებები, რომლებიც კულტურის პალატის საქმიანობის შეზღუდვასა და ჩემი რეპუტაციის შელახვას ემსახურებოდა“, — წერს ოქიტაშვილი.
კულტურის პალატის ხელმძღვანელი ყოფილი მინისტრისგან განმარტებას ითხოვს, რატომ შეიზღუდა, მისი თქმით, კულტურის სფეროს წარმომადგენლებთან მისი ურთიერთობა და რატომ შეჩერდა ღვაწლმოსილი ხელოვანებისთვის ვარსკვლავების გახსნის პროექტი.
ოქიტაშვილი ასევე აცხადებს, რომ კულტურის პალატის თბილისის ფილარმონიაში მდებარე ოფისიდან გამოსახლების მცდელობაც არსებობდა. მისი თქმით, აღნიშნული სივრცე ორგანიზაციას ბიძინა ივანიშვილმა გადასცა და წლების განმავლობაში კულტურის წარმომადგენელთა შეხვედრების ადგილი იყო.
განცხადებაში ოქიტაშვილი სახელმწიფო უსაფრთხოების სამსახურის ხელმძღვანელ მამუკა მდინარაძესაც ახსენებს. მისი მტკიცებით, რუხაძე სხვადასხვა პირთან საუბრისას მას ბიძინა ივანიშვილისა და თეა წულუკიანის გარემოცვასთან აკავშირებდა და მდინარაძის სახელით მასთან ურთიერთობისგან თავის შეკავებისკენ მოუწოდებდა.
„„ოქიტაშვილი ბიძინას აგენტი და წულუკიანის კუდია!“ — ქალბატონო თიკა, ეს ხომ თქვენი სიტყვებია?! ჩემი ინფორმაციით, ამ ფრაზას სხვადასხვა ადამიანებთან საუბრისას თქვენ ხშირად იმეორებდით“, — წერს ოქიტაშვილი.
მისივე განცხადებით, არსებობენ ადამიანები, რომლებიც აღნიშნულ საუბრებს შეესწრნენ.
ოქიტაშვილის განცხადების ერთ-ერთი მთავარი საკითხი პატრიარქ ილია მეორის დაკრძალვის ორგანიზებასა და შესაბამისი სახელმწიფო თანხების ხარჯვას უკავშირდება.
კულტურის პალატის ხელმძღვანელი გენერალურ პროკურატურასა და სახელმწიფო აუდიტის სამსახურს მოუწოდებს, შეისწავლონ დაკრძალვასთან დაკავშირებული ფინანსური გადაწყვეტილებები, მათ შორის სახელმწიფო სახსრების მიმღებები, შესყიდვების პროცედურები და გაწეული ხარჯების მიზნობრიობა.
„რა თანხები დაიხარჯა?! ვის გადაერიცხა სახელმწიფო სახსრები?! როგორ განხორციელდა შესყიდვები და რამდენად მიზნობრივი იყო თითოეული თეთრი? ქალბატონო თიკა, სად წავიდა მილიონები?!“ — აცხადებს ოქიტაშვილი.
ის შესაბამის უწყებებს სთხოვს, შეისწავლონ ყოფილი მინისტრის შესაძლო მონაწილეობა აღნიშნულ ფინანსურ გადაწყვეტილებებში.
ოქიტაშვილი განცხადებაში ასევე ახსენებს ლოპოტაზე გამართულ ძვირადღირებულ საქორწილო წვეულებას, რომელსაც, მისი ინფორმაციით, რუხაძეც ესწრებოდა. ამასთან, აღნიშნავს, რომ მისი მიზანი ყოფილი მინისტრის პირადი ცხოვრების განხილვა არ არის და საჯარო თანამდებობის ყოფილ პირთან დაკავშირებულ ფინანსურ საკითხებზე გამჭვირვალობას ითხოვს.
„საზოგადოებას აქვს უფლება იცოდეს, როგორ და რა გადაწყვეტილებების საფუძველზე იხარჯებოდა სახელმწიფო ფული“, — წერს კულტურის პალატის ხელმძღვანელი.
ოქიტაშვილი აცხადებს, რომ ყოფილ მინისტრთან დაპირისპირების საჯაროდ განხილვას აქამდე თავს არიდებდა, თუმცა ახლა დასმულ კითხვებზე პასუხების მიღებას მოითხოვს.
„მე აღარ ვაპირებ დუმილს! ეს არ არის პირადი დაპირისპირების სურვილი. ეს არის კითხვები, რომლებზეც პასუხებს საქართველო ელოდება!“ — აღნიშნავს ის.
დავით ოქიტაშვილის მიერ გავრცელებული ბრალდებები და ფინანსურ ხარჯებთან დაკავშირებული ეჭვები ამ ეტაპზე მის საჯარო განცხადებას ეფუძნება. წარმოდგენილ ინფორმაციაში არ არის მითითებული კონკრეტული ფინანსური დარღვევების დამადასტურებელი დოკუმენტები ან შესაბამისი უწყებების დასკვნები.
ასევე უცნობია, მიმართა თუ არა ოქიტაშვილმა პროკურატურასა და სახელმწიფო აუდიტის სამსახურს ოფიციალური განცხადებით.
თინათინ რუხაძის პასუხი დავით ოქიტაშვილის ბრალდებებზე მოწოდებულ ინფორმაციაში წარმოდგენილი არ არის.
ფოტო - დათო ოქიტაშვილის პოსტს ერთვის
