ამის შესახებ ჯაფარიძე სოციალურ ქსელში წერს და აღნიშნავს, რომ არსებული ვითარების არასწორი შეფასება საზოგადოებაში მცდარ მოლოდინებს აჩენს.
„მცდარი შეფასებები და მცდარი მოლოდინები სახიფათოა. „პარტიების აკრძალვა“ მცდარი შეფასებაა, რომელიც მცდარ მოლოდინებს აჩენს“, – აცხადებს ჯაფარიძე.
მისი შეფასებით, ე.წ. საბოტაჟის საქმე, საკონსტიტუციო სასამართლოში წარდგენილი სარჩელი და პოლიტიკური პარტიების, სისხლის სამართლისა და გრანტების შესახებ კანონმდებლობაში განხორციელებული ცვლილებები ერთიან კონტექსტში უნდა განიხილებოდეს.
ჯაფარიძე ვარაუდობს, რომ ამ პროცესების შედეგად 2024 წლის საპარლამენტო არჩევნებში მონაწილე ოთხი ოპოზიციური კოალიციისა და პარტიის ლიდერები შესაძლოა პატიმრობაში ან ქვეყნის ფარგლებს გარეთ აღმოჩნდნენ.
ამასთან, მისი განცხადებით, პოლიტიკური საქმიანობის ფაქტობრივი შეზღუდვის საფრთხე ემუქრება აღნიშნული პოლიტიკური გაერთიანებების საარჩევნო სიებში მყოფ დაახლოებით 600 ადამიანს, ასევე „ფედერალისტების“ წარმომადგენლებს.
ჯაფარიძე მიიჩნევს, რომ შეზღუდვები შესაძლოა შეეხოს სამოქალაქო სექტორში დასაქმებულ ადამიანებსაც, რომლებსაც ბოლო რვა წლის განმავლობაში უცხოური ორგანიზაციებისგან გრანტი ან ხელფასი მიუღიათ.
„უკანასკნელი 8 წლის განმავლობაში სამოქალაქო სექტორში მომუშავეთ, ყველას, ვისაც ერთხელ მაინც მიუღია უცხოური ორგანიზაციისგან გრანტი/ხელფასი, ასევე, დე ფაქტო აკრძალული ექნებათ პოლიტიკური საქმიანობა“, – წერს ის.
ოპოზიციონერი პოლიტიკოსის ვარაუდით, შესაძლოა შეიზღუდოს ახალი პოლიტიკური პარტიების შექმნის შესაძლებლობაც, თუკი მათ შემადგენლობაში აღმოჩნდებიან პირები, რომლებზეც აღნიშნული სამართლებრივი შეზღუდვები გავრცელდება.
ჯაფარიძე განმარტავს, რომ მის მიერ აღწერილი შედეგები კანონმდებლობაში პირდაპირ და ერთმნიშვნელოვნად არ არის ჩამოყალიბებული, თუმცა მიიჩნევს, რომ სხვადასხვა სამართლებრივი მექანიზმის ერთობლიობა სწორედ ამგვარ შედეგამდე შეიძლება მივიდეს.
„ეს ყველაფერი ასე ექსპლისიტურად არ წერია; ვიღაცებზე, ვინც თავს დაუხრის და/ან დემოკრატიის სურათის დახატვაში დაეხმარება, შეიძლება გამონაკლისებიც დაუშვას, მაგრამ ერთობლიობაში ამ სურათისკენ მიდის ივანიშვილი/მიდიან რუსები“, – აცხადებს ჯაფარიძე.
მისი შეფასებით, ხელისუფლების მიზანი პოლიტიკური კონკურენციის შეზღუდვა და საჯარო ცხოვრებაში აქტიურად ჩართული ადამიანების მნიშვნელოვანი ნაწილის პოლიტიკური პროცესებიდან ჩამოშორებაა.
„ასე რომ, რამდენიმე პარტია კი არ იკრძალება, დე ფაქტო პოლიტიკური საქმიანობა ეკრძალება სოციუმის საკმაოდ დიდ ჯგუფს, რომელიც უკანასკნელი წლების განმავლობაში რაიმე ფორმით ჩართული იყო საჯარო ცხოვრებაში“, – წერს ის.
ჯაფარიძე ასევე აკრიტიკებს მოლოდინს, რომ არსებული პოლიტიკური ვითარების შეცვლას ახალი, საზოგადოებისთვის აქამდე უცნობი ლიდერის გამოჩენა შეძლებს.
მისი თქმით, ნაკლებად რეალისტურია ისეთი პოლიტიკური ფიგურის გამოჩენის მოლოდინი, რომელსაც საზოგადოებრივი ნდობა და საკმარისი პოლიტიკური გამოცდილება ექნება, თუკი მან წლების განმავლობაში საჯარო ცხოვრებაში მონაწილეობა არ მიიღო.
ამასთან, ჯაფარიძე აცხადებს, რომ არსებული პოლიტიკური პროცესების შეჩერება შესაძლებელია, თუმცა ამისთვის საჭიროა ვითარების სწორად შეფასება, მცდარი მოლოდინებისგან გათავისუფლება და წინააღმდეგობის გაგრძელება.
„ამის შეჩერება და ბოროტი სისტემის ჩამოშლა შესაძლებელია. ამისთვის საჭიროა, რომ სურათი სწორად დავინახოთ და მცდარი მოლოდინები არ გვქონდეს, გოდებას შევეშვათ და გავაგრძელოთ ბრძოლა ყველგან, სადაც შეგვიძლია და როგორც შეგვიძლია“, – აღნიშნავს ის.
განცხადების ბოლოს ზურაბ გირჩი ჯაფარიძე 25 ოქტომბერს, 19:00 საათზე, თბილისის სახელმწიფო უნივერსიტეტთან დაგეგმილ საპროტესტო შეკრებას ახსენებს.
აღსანიშნავია, რომ ჯაფარიძის მიერ დასახელებული შესაძლო შეზღუდვების მასშტაბი და მათი გავრცელება ათასობით მოქალაქეზე მის პოლიტიკურ და სამართლებრივ პროგნოზს წარმოადგენს. ეს არ ნიშნავს, რომ ყველა აღნიშნულ პირს პოლიტიკური საქმიანობა უკვე კანონიერად აეკრძალა.
