დისკრიმინაციული კამპანია, ეთნიკური შუღლი, შოვინიზმი როდესაც ღვივდება, პირველივე დღეს და პირველივე წამებზე უნდა გამოეხმაუროს ამას სახალხო დამცველი. არავითარი განცხადება ჯერჯერობით მისგან არ გვესმის, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.
მისივე თქმით, სახალხო დამცველი პირდაპირ არის ჩართული პოლიტიკურ პროცესებში.
„წინა ქსენოფობიური კამპანია როცა აგორდა „ნაცმოძრაობის“ მიერ, მაშინ 10 დღე დასჭირდა სახალხო დამცველს, ჩვენი მოწოდებების მიუხედავად, ვიდრე გააკეთებდა განცხადებას ქსენოფობიასთან დაკავშირებით. შეგახსენებთ, რომ ეს არის სახალხო დამცველის პირდაპირი მოვალეობა. როდესაც ღვივდება დისკრიმინაციული კამპანია, ეთნიკური შუღლი, შოვინიზმი, პირველივე დღეს და პირველივე წამებზე უნდა გამოეხმაუროს ამას სახალხო დამცველი, 10 დღე დასჭირდა მაშინ, მარტში, ვიდრე გამოეხმაურებოდა ამ განცხადებას და ახლა არავითარი განცხადება ჯერჯერობით მისგან არ გვესმის.
ეს ადამიანი არის პირდაპირ ჩართული პოლიტიკურ პროცესებში, მეტიც, როგორც მამუკა მდინარაძემ აღნიშნა, ის იყო პირდაპირ ჩართული კამპანიაში, რომლის ფარგლებშიც მოხდა, მაგალითად, მთავრობის გადადგომის მოთხოვნის წამოყენება, ე.წ. ტექნიკური მთავრობის შექმნის მოთხოვნა. ის ცდილობს პოლიტიკოსობას, რეიტინგი არ აქვს, მაგრამ ცდილობს. საბოლოო ჯამში, თუ არ ვცდები, 7 დეკემბერს გასდის ვადა და საბოლოოდ შეიძენს იმ სტატუსს, რომელიც არაფორმალურად დღესაც აქვს, ცდილობს, იყოს პოლიტიკოსი. საბოლოოდ, დეკემბერში გახდება ალბათ პოლიტიკოსი“, – განაცხადა კობახიძემ.
ამასთან, კობახიძემ კომენტარი გააკეთა მომავალი სახალხო დამცველის არჩევის საკითხზეც და აღნიშნა, რომ სახალხო დამცველი უნდა აირჩეს შეთანხმებით უმრავლესობასა და ოპოზიციას შორის, რასაც ფართო კონსულტაციები სჭირდება.
მისივე განცხადებით, კანდიდატურაზე ერთობლივად უნდა ჩამოყალიბდნენ და შემდეგ პარლამენტში კენჭი უყარონ.
„ჩვენ ვერ გვეყოლება კანდიდატი იმ მარტივი მიზეზის გამო, რომ სახალხო დამცველი უნდა აირჩეს შეთანხმებით უმრავლესობასა და ოპოზიციას შორის, ამას სჭირდება ფართო კონსულტაციები. ეს კონსულტაციები დაიწყება სექტემბრიდან. მანამდე ჩვენ ოპოზიციას შევთავაზებთ შერჩევის ინკლუზიურ პროცედურას. ამის შემდეგ ერთობლივად უნდა ჩამოვყალიბდეთ კანდიდატურაზე და შემდეგ პარლამენტი უყრის კენჭს“, – აღნიშნა კობახიძემ.
