გიორგი ვაშაძე - ოპოზიციონერ კოლეგებს მოვუწოდებთ, მგლის თავზე სახარების კითხვას შევეშვათ და მმართველი პარტიის ლუსტრაცია მოვახდინოთ

ოპოზიციონერ კოლეგებს მოვუწოდებთ, მგლის თავზე სახარების კითხვას შევეშვათ და მმართველი პარტიის ლუსტრაცია მოვახდინოთ, – ამის შესახებ „სტრატეგია აღმაშენებლის“ წევრმა გიორგი ვაშაძემ განაცხდა.

მისი თქმით, „სტრატეგია აღმაშენებელი“ არ მიიღებს მონაწილეობას იმ თაღლითურ სქემაში, „რომელსაც „ქართული ოცნება“ აბლაბუდასავით ხლართავს“. ვაშაძის განცხადებით, სახალხო დამცველის შერჩევის კანონპროექტი შექმნილია იმისთვის, რომ „ქართულმა ოცნებამ“ სამოქალაქო სექტორის მიერ წამოწყებული პროცესი ჩაშალოს.

„ჩვენ არც ერთ შემთხვევაში არ მივიღებთ მონაწილეობას იმ თაღლითურ სქემაში, რომელსაც ახლა „ქართული ოცნება“ აბლაბუდასავით ხლართავს. უფრო მეტიც, ჩვენს ოპოზიციონერ კოლეგებს მოვუწოდებთ, მგლის თავზე სახარების კითხვას შევეშვათ და მმართველი პარტიის ლუსტრაცია მოვახდინოთ. რა გააკეთა „ქართულმა ოცნებამ“ და რა მიიღო? იმის ნაცვლად, რომ შვიდკაციან ჯგუფებს შეგვეძლო კანდიდატების პირდაპირ სხდომაზე დაყენება და ვაპირებდით, რომ სამოქალაქო სექტორიდან ყველაზე ღირსეული აგვერჩია და დაგვეყენებინა, ფაქტობრივად, წინარე პროცედურა შექმნა, რითაც უნდა, ფილტრი გააკეთოს პარლამენტის თავმჯდომარემ ვიღაც აკადემიურ წრეებთან ერთად. ისეთივე უნამუსო აკადემიურ წრეებთან ერთად, რომელიც, მაგალითად, ცესკო-ს თავმჯდომარისა და მისი წევრების შერჩევის პროცესშია, რომლებიც კონკრეტულ კანდიდატებს ხელს აწერენ სუს-ის დავალებით. ამის შემდეგ, უნდა გავმართოთ უაზრო მსჯელობა – ვინ კარგია, ვინ ღირსეული და ვინ უღირსი? შალვა პაპუაშვილთან არ უნდა იყოს კვაზი, უბედური და ვითომ კრიტერიუმებზე სამუშაო ჯგუფი არ უნდა იყოს, რომელიც არარაობაა და არაფერს წარმოადგენს ამ პარლამენტში. რასაც ეუბნებიან, იმას აკეთებს მხოლოდ, რასაც ჩასძახებენ, იმას ამოიძახებს. ასევე სამოქალაქო სექტორი კანდიდატად ვისაც შეარჩევს, ამ რაღაც პროცედურაში უნდა დარეგისტრირდნენ, რაც მოიგონა პრორუსმა, თაღლითმა „ქართულმა ოცნებამ“. ჩვენ, შვიდკაციანმა ჯგუფებმა, ოპოზიციამ ერთობლივად მაინც უნდა წარვადგინოთ ისეთი ღირსეული კანდიდატები, ვისაც მხარს ავტორიტეტული სამოქალაქო სექტორი მხარს დაუჭერს. ეს პროცესი ფორმალურად უნდა გავიაროთ, ხოლო სხდომაზე უნდა წარდგნენ ის კანდიდატები, რომლებსაც სამოქალაქო სექტორი შემოგვთავაზებს. არ ვიცი, ოპოზიციის ნაწილმა სახალხო დამცველის შერჩევის კანონპროექტს მხარი პირველი მოსმენით რატომ დაუჭირა. კარგია, რომ მეორე მოსმენით მხარი არ დაუჭირეს. ეს კანონპროექტი შექმნილია იმისთვის, რომ სამოქალაქო სექტორის მიერ წამოწყებული პროცესი ჩაშალოს. მათ მიერ მოყვანილი აკადემიური წრეების მოყვანილი კანდიდატები რად მინდა? – ეს თაღლითური სქემა იმისთვის არის შექმნილი, რომ ორი ხმა რომელიმე ოპოზიციური პარტიიდან მიიღონ და პროცესი „გაუპრაონ“. ვინც მათ ორ ხმას დაუმატებს, პირდაპირ ვიტყვი, რომ ის არ არის „ქართული ოცნება“, – განაცხადა გიორგი ვაშაძემ.