მსურს, ვუთხრა ყველა პოლიტიკოსს, როგორც მმართველ გუნდში, ისე ოპოზიციაში, ასევე სამოქალაქო საზოგადოებას, ეცადეთ, იმუშაოთ ერთად აუცილებელი რეფორმებისთვის, რადგან საქართველოს ადგილი ევროპულ ოჯახშია და საქართველო ევროპული ქვეყანაა, – ამის შესახებ საქართველოს პირველ არხს ევროსაბჭოს საპარლამენტო ასამბელაზე საქართველოს საკითხის მომხსენებელმა ტიტუს კორლატეანმა განუცხადა.
როგორც მან აღნიშნა, დებატებისას, რომელიც დასავლეთ ბალკანეთისა და ევროკავშირის გაფართოებას ეხებოდა, გაფართოების აუცილებლობაზე ისაუბრა.
„ეს ძალიან მნიშვნელოვანია როგორც წევრი ქვეყნებისთვის, ასევე იმ ქვეყნებისთვის, რომლებსაც გაწევრიანება სურთ. გამოსვლაშიც ვისაუბრე დასავლეთ ბალკანეთისა და აღმოსავლეთ პარტნიორობის ქვეყნებზე, მათ შორის საქართველოზეც, რომელმაც გეოპოლიტიკური მდგომარეობის გათვალისწინებით, ჩემი აზრით, წლის ბოლომდე უნდა მიიღოს კანდიდატის სტატუსი.
ამავდროულად ეს დამოკიდებულია გაწეულ სამუშაოზე, კრიტერიუმებზე და რეფორმებზე. ყველა იმ ქვეყანამ, რომელმაც მიიღო კანდიდატის სტატუსი და შემდეგ გაწევრიანდა, ეს გზა გაიარა. ასე იყო ჩემი ქვეყნის, რუმინეთის შემთხვევაშიც. ევროკავშირმა განსაზღვრა რეფორმების დღის წესრიგი და ეს რეფორმები დაახლოებით იგივეა, როგორიც ევროსაბჭოს მიდგომები. როგორ ართმევს ამ გამოწვევას თავს საქართველო, ამას მე ჩემს ანგარიშშიც დავწერ. რაც შეეხება განსაზღვრულ პოლიტიკურ კრიტერიუმებს, ეს გულისხმობს ჯანსაღ, ძლიერ დემოკრატიას და ნაკლებ პოლარიზაციას, რაც საქართველოს ეროვნულ ინტერესებს აზიანებს.
ამავდროულად, ძალიან მნიშვნელოვანია ხალხის მხარდაჭერა, რომელიც ყოველთვის ძალიან მაღალი იყო ევროპული მომავლის მიმართ. მსურს, ვუთხრა ყველა პოლიტიკოსს, როგორც მმართველ გუნდში, ისე ოპოზიციაში, ასევე სამოქალაქო საზოგადოებას – ეცადეთ, იმუშაოთ ერთად აუცილებელი რეფორმებისთვის, რადგან საქართველოს ადგილი ევროპულ ოჯახშია და საქართველო ევროპული ქვეყანაა“, – განაცხადა ტიტუს კორლატეანმა.
