ანა ნაცვლიშვილი პარლამენტის დატოვებაზე-სწორად არ მიმაჩნია

დასავლეთის მხარდაჭერა პარლამენტის დატოვებას არ ჰქონდა და არ ექნება. ეს არის ჩემთვის ძალიან მნიშვნელოვანი და ეს არის ის რეალობა, რომელშიც ყველა პოლიტიკურმა ძალამ უნდა მიიღოს გადაწყვეტილება , - ამის შესახებ „ლელოს“ დეპუტატმა ანა ნაცვლიშვილმა განაცხადა, რითაც პარლამენტის დატოვების თაობაზე გიორგი ვაშაძის განცხადებას გამოეხმაურა.

მისი თქმით, ის პატივს სცემს სხვების გადაწყვეტილებას, თუმცა მას არ ეთანხმება.

„მათი გადასაწყვეტია, ეს სხვა პოლიტიკური პარტიაა, მე ყველანაირ შემთხვევაში პატივს ვცემ სხვების გადაწყვეტილებას. მე რა თქმა უნდა, სწორად არ მიმაჩნია. რომ მიმაჩნდეს, იგივე განცხადებას გავაკეთებდი, თუმცა განსხვავებულ აზრსაც პატივისცემით მოვეკიდები. ჩვენთვის მნიშვნელოვანია ურთიერთობები, რაც სხვა პოლიტიკურ პარტიებთან გვაქვს. ამ შემთხვევაში, ამ მოსაზრებას მე არ ვიზიარებ, რადგან ვერ ვხედავ ამის პრაქტიკულ დანიშნულებას, მაგრამ ეს პოლიტიკური გადაწყვეტილებაა და ყველას აქვს უფლება თავად მიიღოს ეს გადაწყვეტილება. რაც შეეხება უცხოელ პარტნიორებთან მუშაობას, ქართული ოპოზიციური სპექტრი ვერ შეძლებს რუსული ძალების და გავლენების ქვეშ მყოფი ხელისუფლებისგან საქართველოს გათავისუფლებას დასავლეთის მხარდაჭერის გარეშე. დასავლეთის მხარდაჭერა პარლამენტის დატოვებას არ ჰქონდა და არ ექნება. ეს არის ჩემთვის ძალიან მნიშვნელოვანი და ეს არის ის რეალობა, რომელშიც ყველა პოლიტიკურმა ძალამ უნდა მიიღოს გადაწყვეტილება. ასევე, ვერ ვხედავ ვერანაირ არგუმენტს, პარლამენტში ყოფნა რატომ უშლის ოპოზიციას ხელს სხვა ფრონტზეც იბრძოლოს ეფექტიანად,“ - განაცხადა ნაცვლიშვილმა.