ვითარება რთულია- ალასანიას განცხადებით, ძალიან ცდილობს, რაღაც შეჭამოს, მაგრამ ორი ლუკმა არის მაქსიმუმი, ზოგჯერ ამასაც ვერ ინარჩუნებს

კლინიკა „ვივა მედში“ მყოფი მესამე პრეზიდენტი მიხეილ სააკაშვილი დედამ, გიული ალასანიამ მოინახულა.

ალასანიამ ჟურნალისტებთან სააკაშვილის ჯანმრთელობის გართულებულ მდგომარეობაზე კიდევ ერთხელ გაამახვილა ყურადღება და აღნიშნა, რომ „საკვების ორი ლუკმა არის მაქსიმუმი, რომლის მიღებასაც ის ცდილობს“.

კანონით გაუთვალისწინებელი გამონაკლისი ვერავის მიმართ იქნება დაშვებული – რატი ბრეგაძე სააკაშვილისთვის სასჯელის შესაძლო გადავადებაზე

„დავდივარ ყოველდღე და ვარ მოწმე, რომ ძალიან ცდილობს, რაღაც შეჭამოს, მაგრამ ორი ლუკმა არის ხოლმე მაქსიმუმი, ორ ლუკმასაც ზოგიერთ შემთხვევაში ვერ ინარჩუნებს, ამოდის უკან.. თუ ინარჩუნებს, ძალიან უჭირს, ეწყება ხშირი სუნთქვა და ადამიანს უჭირს საკვების მიღება“, – განაცხადა გიული ალასანია.

ჟურნალისტის შეკითხვაზე, რას ფიქრობს „ვივამედის“ დირექტორის განცხადებაზე, რომ მიზანმიმართულად არ იღებს საკვებს, გიული ალასანია აღნიშნავს:

„ეს ძალიან უცნაურ განცხადებად მეჩვენება, იმიტომ, რომ მეც ვარ ამის მოწმე, და დავსწრებივარ როგორ ხდება კვება“.

ცნობისთვის,  ზურაბ ჩხაიძემ ჟურნალისტებთან საუბრისას განმარტა, რომ  ნაზოგასტრალური ზონდი იმ შემთხვევაში გამოიყენება, თუ ადამიანს საკვების მიღებისას ღებინების შეგრძნება აქვს.

„შემოსვლიდანვე, ყოველდღიურად გვაქვს პაციენტთან კვებასთან დაკავშირებით საუბარი. იცით, რომ პაციენტი 50 დღის განმავლობაში შიმშილობდა, ეს აისახა მის ჯანმრთელობის მდგომარეობაზე. შემდეგში უნდა გაგრძელებულიყო სრულფასოვანი კვება. ამის შესახებ ყოველდღე გვაქვს პაციენტთან საუბარი. რაც შეეხება ზონდით კვებას, რაც იკითხეთ, აქ იძულებით კვებაზე არ არის საუბარი, თუ ადამიანს, ნებისმიერ პაციენტს აქვს ღებინების შეგრძნება საკვების მიღებისას, ამ შემთხვევაში გამოიყენება ნაზოგასტრალური ზონდი პაციენტთან შეთანხმებით და არა იძულებითი წესით!“, - აღნიშნავს ჩხაიძე.