ზერბაიჯანის პრეზიდენტი ილჰამ ალიევი აცხადებს, რომ ლაჩინი-სტეპანაკერტის გზა აზერბაიჯანის მიერ ბლოკირებული არ არის. ამის შესახებ აზერბაიჯანის პრეზიდენტის ოფიციალურ გვერდზე გავრცელებული ინფორმაციის მიხედვით, ილჰამ ალიევმა აშშ-ის სახელმწიფო მდივანთან, ენტონი ბლინკენთან სატელეფონო საუბრისას განაცხადა.
„სატელეფონო საუბრის დროს აშშ-ის სახელმწიფო მდივანმა შეშფოთება გამოთქვა აზერბაიჯანის ტერიტორიაზე, ლაჩინის დერეფანში შექმნილი სიტუაციის გამო. ენტონი ბლინკენმა გამოხატა აშშ-ის მხარდაჭერა სომხეთსა და აზერბაიჯანს შორის ურთიერთობების ნორმალიზებისა და სამშვიდობო შეთანხმების მოლაპარაკებების მიმართ. პრეზიდენტმა ილჰამ ალიევმა აღნიშნა, რომ ლაჩინი-ხანქენდის (სტეპანაკერტის) გზაზე არანაირი ბლოკადა არ არის და ხაზი გაუსვა, რომ 2022 წლის 12 დეკემბრის შემდეგ ამ გზაზე უზრუნველყოფილია 980 სატრანსპორტო საშუალების გავლა, რომელთაგან 850-ზე მეტი რუს მშვიდობისმყოფელებს ეკუთვნოდა, 120-ზე მეტი კი – „წითელი ჯვრის“ საერთაშორისო კომიტეტს. ამას გარდა, აზერბაიჯანის პრეზიდენტმა განაცხადა რომ „წითელი ჯვრის“ საერთაშორისო კომიტეტის საშუალებით უზრუნველყოფილია ყარაბაღში მცხოვრები 90-მდე ავადმყოფის და სამედიცინო დახმარების საჭიროების მქონე პირის სომხეთში ტრანსპორტირება. პრეზიდენტმა ილჰამ ალიევმა აღნიშნა, რომ ეს ყველაფერი მეტყველებს იმაზე, რომ ლაჩინი-ხანქენდის გზა არ არის დაკეტილი აზერბაიჯანის მიერ“, – ნათქვამია აზერბაიჯანის პრეზიდენტის ადმინისტრაციის მიერ გავრცელებულ განცხადებაში.
ილჰამ ალიევმა ასევე განაცხადა, რომ აზერბაიჯანულ ტერიტორიებზე, სადაც დროებით განთავსებული არიან რუსი მშვიდობისმყოფელები, წიაღისეულის საბადოების უკანონო ექსპლუატაცია უნდა შეწყდეს, აზერბაიჯანს კი უნდა შეეძლოს მუდმივი მონიტორინგისა და ინსპექტირების ჩატარება. ალიევმა ასევე განაცხადა, რომ ლაჩინის გზა გამოიყენება სომხეთის მიერ წარმოებული ნაღმების უკანონო გადატანისთვის.
გარდა ამისა, ალიევმა აღნიშნა, რომ სამშვიდობო შეთანხმება სომხეთსა და აზერბაიჯანს შორის უნდა მოიცავდეს მხოლოდ ორმხრივი ურთიერთობების ნორმალიზებას საერთაშორისო სამართლის ნორმების და აზერბაიჯანის მიერ წარდგენილი ხუთი პრინციპის საფუძველზე. მისი თქმით, ყარაბაღის ეკონომიკურ ზონაში მცხოვრები სომხური მოსახლეობის უფლებები და უსაფრთხოება დაცული იქნება აზერბაიჯანის კანონმდებლობის შესაბამისად.
ილჰამ ალიევსა და ენტონი ბლინკენს შორის სატელეფონო საუბრის შესახებ ინფორმაციას სახელმწიფო დეპარტამენტიც ავრცელებს. უწყების ცნობით, ბლინკენმა მოუწოდა ილჰამ ალიევს, დაუყოვნებლივ გახსნას ლაჩინის დერეფანი კომერციული გადაზიდვებისთვის. მან ხაზი გაუსვა, რომ ლაჩინის დერეფანში ჰუმანიტარული კრიზისის რისკი ძირს უთხრის სომხეთსა და აზერბაიჯანს შორის მშვიდობის დამყარების პერსპექტივას.
