"ოცნებიდან" დემარშით წასული ეკა ბესელია ფიქრობს, რომ დეპუტატებს, რომლებსაც მმართველი პარტიის დატოვება სურთ, რთული გზა ექნებათ გასავლელი.
პარტია "სამართლიანობისთვის" ლიდერი ხელისუფლების მხრიდან წამსვლელების მიმართ მუქარას და მანიპულაციებს არ გამორიცხავს, თუმცა ამბობს, რომ ამ ბრძოლაში ყევლაზე მნიშვნელოვანი ღირსებაა.
"ყველა ამ ადამიანმა, ვისაც საკუთარი ღირსება უფრო მნიშვნელოვნად მიაჩნია, უნდა მიიღოს გადაწყვეტილება, სად დგას, ვისთან დგას, რა ღირებულებებთან დგას. რა თქმა უნდა, მათზე იქნება სხვადასხვა ტიპის მანიპულაციები, შეთავაზება, იძულება, მუქარა. არ იქნება იოლი გადაწყვეტილების მიღება. ვინც ჩუმად წავა, ვინც მიიღებს გადაწყვეტილებას, რომ უხმოდ დატოვოს პარტია, მათ შეთავაზებებიც ექნებათ. წნეხი იქნება ძალიან დიდი, რა თქმა უნდა და ძალიან ბევრი პრობლემა უნდა გადალახონ მათ. ამას დიდი გამბედაობა სჭირდება, მაგრამ ადამიანმა თითონ უნდა გადაწყვიტოს, ღირსებაა ყველაზე მნიშვნელოვანი თუ ის კომფორტის სივრცე, - ამბობს ბესელია.
რა ხდება "ქართულ ოცნებაში" - მმართველი პარტიის ლიდერები დუმილის რეჟიმში არიან. არცერთი მათგანი საზოგადოებასთან არ ჩნდება და არ ამბობს, რა ხდება პარტიაში.
არსებული ინფორმაციით, რუსული კანონის მოწინააღმდეგე დეპუტატების ნაწილს დუმილის სანაცვლოდ დასაქმებას საჯარო სამსახურებში პირდებიან. ერთ-ერთი ვერსიით, დეპუტატი ჩაჩიბაია თავდაცვის უწყებაში გადაჰყავთ, გეგმები აქვთ კოვზანაძესთან და ხელაშვილთან დაკავშირებითაც. რაც შეეხება სერკეენკოს და იობაშვილს, მათ "ქართული ოცნების" პირობებსი მუშაობა არცერთ თანამდებობაზე არ უნდათ.
