ახლახან ვნახე ცნობები, მთავრობის ინფორმაცია, რომ ამერიკელ პარტნიორებთან კონსულტაციით იქნა ეს გადაწყვეტილება მიღებული. ეს არის, რაც წავიკითხე, – ამის შესახებ უსაფრთხოების თანამედროვე გამოწვევების საკითხებში ნატო-ს გენერალური მდივნის თანაშემწემ, ჯეიმს აპატურაიმ საერთაშორისო სამხედრო სწავლება „დამცველი 2023“-თან დაკავშირებით განაცხადა.
ამასთან, აპატურაის თქმით, საქართველოს მთავრობის წარმომადგენლებთან განიხილა ერთობლივი წვრთნების ჩატარება, კერძოდ, ენერგეტიკული და კიბერუსაფრთხოების მიმართულებით.
„რისი თქმაც შემიძლია, ისაა, რომ სულ ახლახან განვიხილე მთავრობის წარმომადგენლებთან წვრთნები, რომელშიც საქართველო მიიღებს მონაწილეობას. ეს წვრთნები ასევე უკავშირდება ჩემს ახლანდელ საქმიანობას, ესაა კიბერ და ენერგეტიკული უსაფრთხოება. ვიმსჯელეთ ერთობლივ წვრთნებზე, რომლის ჩატარებაც ერთად შეგვიძლია. კერძოდ, ენერგეტიკული და კიბერმიმართულებით, რომელშიც საქართველოს მონაწილეობა, იმედი მაქვს, მალე დამტკიცდება. საბოლო ჯამში, ჩვენ ახლა ისეთ ვითარებაში ვართ, როდესაც სამხედრო გზით თავდაცვის შესაძლებლობა კიდევ უფრო გადაუდებელი, უფრო მნიშვნელოვანი გახდა. ასე რომ, მე, უბრალოდ, წავახალისებდი მაქსიმალურ თანამშრომლობას წვრთნებში“, – აღნიშნა ჯეიმს აპატურაიმ, რომელიც საქართველოში ვიზიტით იმყოფება.
აშშ-ის საელჩომ განაცხადა, რომ „დამცველი 2023“-ში საქართველოს თავდაცვის ძალების მონაწილეობასთან დაკავშირებით გადაწყვეტილება ერთობლივად მიიღეს.
2023 წელს საქართველოსთან სამხედრო თანამშრომლობის შესახებ აშშ-ის საელჩოს განცხადებაში აღნიშნულია, რომ ერთობლივად გადაწყდა, რესურსები მიიმართოს ქვეყნის შიდა, მრავალეროვნულ სწავლებებზე.
