ე.წ. ტროიკა ისევ შეიკრა. როგორც ადრე მიაჩნდათ ქვეყანა თავიანთ საკუთრებად და ამით ძალიან ბევრი კარგი საქმე დაიჩრდილა, დღესაც, ანალოგიურად, პარტია ჰგონიათ თავიანთი საკუთრება, – ამის შესახებ „ნაციონალური მოძრაობის“ წევრმა, ბაჩო დოლიძემ განაცხადა.
დოლიძემ კომენტარი გააკეთა „ნაციონალური მოძრაობის“ ყოფილი თავმჯდომარის, ნიკა მელიას განცხადებაზე, რომლის თანახმადაც, „ნაციონალური მოძრაობის“ მართვის ბერკეტებს სრულად ფლობენ დავით კეზერაშვილი, ვანო მერაბიშვილი და ზურაბ ადეიშვილი.
„ახლა უნიკალური შესაძლებლობა გვაქვს, პარტია ან გათავისუფლდება ტვირთისგან და შეძლებს რეჟიმთან ბრძოლას, ან შეეწირება იმას, რომ სასურველი მეტოქე იქნება „ნაციონალური მოძრაობა“ ამ კონფიგურაციით ბიძინასთვის. შესაბამისად, ჯერი ამომრჩეველზეა. იქნება ბრძოლა ცვლილებებისთვის. დარწმუნებული ვარ, ჩვენ ამ ამრჩეველთან ერთად მოგიწევს ძალიან მნიშვნელოვანი გადაწყვეტილების მიღება“, – აღნიშნა დოლიძემ.
მისივე თქმით, „ნაციონალურ მოძრაობაში“ ყველა გადაწყვეტილებას დავით კეზერაშვილი, ვანო მერაბიშვილი და ზურაბ ადეიშვილი იღებენ.
„თუ ვინმეს გონია, რომ „ნაციონალური მოძრაობის“ შენობაში, კონკრეტულად, თავმჯდომარე რაიმე ტიპის გადაწყვეტილებას იღებს, ეს ასე არ გახლავთ. ყველა გადაწყვეტილებას იღებენ ეს ადამიანები. ისეთი დაპირებები აკეთებინეს, ოღონდ მოსულიყვნენ მენეჯმენტში. შესაბამისად, მერე ალბათ ყველაფერი ლევანს დაბრალდებოდა. ასე რომ, არ მგონია, დიდი წუხილი ჰქონდეთ იმ ადამიანებს, ვინც მის უკან დგანან. გასაგები იყო, რომ ფიზიკურად ვერსად შეიჭრებოდა. ცუდია, როდესაც ხდება ქვეყნის მესამე პრეზიდენტის სახელით მანიპულირება და სპეკულირება“, – განაცხადა დოლიძემ.
