თურქეთის საპრეზიდენტო არჩევნების მეორე ტური 28 მაისს გაიმართება. როგორც საქართველოს პირველი არხის კორესპონდენტი თურქეთიდან იუწყება, ამის შესახებ თურქეთის უმაღლესი საარჩევნო საბჭოს თავმჯდომარემ, აჰმეთ იენერმა განაცხადა.
აჰმეთ იენერის თქმით, დღეიდან მეორე ტურის საარჩევნო კამპანია ოფიციალურად დაიწყო. უმაღლესი საარჩევნო საბჭოს თავმჯდომარემ პრესკონფერენციაზე ასევე აღნიშნა, რომ 14 მაისის არჩევნებზე დაფიქსირდა მაღალი აქტივობა, რომელმაც 88, 92% შეადგინა.
მეორე ტურში ორი კანდიდატი, მოქმედი პრეზიდენტი რეჯეფ თაიფ ერდოღანი და გაერთიანებული ოპოზიციის კანდიდატი ქემალ ქილიჩდაროღლუ მიიღებენ მონაწილეობას. ამ დროისთვის არსებული წინასწარი მონაცემებით, თურქეთის მოქმედ პრეზიდენტ რეჯეფ თაიფ ერდოღანს ხმათა 49.50 %, გაერთიანებული ოპოზიციის კანდიდატ ქემალ ქილიჩდაროღლუს კი, 44,89% აქვს.
