ჩვენი ჯარების აქტიური მოქმედება იტყვის იმას, რაც საჭიროა, – განაცხადა უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას.
მისი თქმით, აქტიურად მუშაობენ საჰაერო თავდაცვის სისტემების შემდგომ გაუმჯობესებაზე, რისთვისაც ყოველდღიურად თანამშრომლობენ პარტნიორ ქვეყნებთან.
ვოლოდიმირ ზელენსკიმ ისაუბრა ესტონეთის პრეზიდენტთან მოლაპარაკებების შესახებაც, რომლის მიზანიც იყო უკრაინის უსაფრთხოების დაცვასთან დაკავშირებული საკითხების განხილვა გრძელვადიან პერსპექტივაში.
„ესტონეთი ფუნდამენტურად გვეხმარება იარაღითა და აღჭურვილობით, მხარს უჭერს ჩვენს ნაბიჯებს ნატო-სკენ. მან იცის, რამდენად მნიშვნელოვანია, რომ ჩვენ დავამარცხოთ რუსიციზმი ახლავე ჩვენს უკრაინულ მიწაზე“, – აღნიშნა ზელენსკიმ.
ამასთან, უკრაინის პრეზიდენტმა დასძინა, რომ მზადაა ისეთი სიახლეებისთვის, რომლებიც უკრაინას კიდევ უფრო გაძლიერების საშუალებას მისცემს.
„მე გავმართე რამდენიმე შეხვედრა, ხანგრძლივი და შინაარსიანი, ჩვენი ყოვლისმომცველი პოლიტიკის ჩამოყალიბებასთან დაკავშირებით მომავლისთვის. ის, რაც ეხება სახელმწიფოს შემდგომ ტრანსფორმაციას და ჩვენს მონაწილეობას გლობალურ პროცესებში. როგორც ყოველთვის, ჩვენ ვემზადებით სიახლეებისთვის და გადაწყვეტილებებისთვის, რომლებიც კიდევ უფრო მეტ ძალას მისცემს უკრაინას და უკრაინელებს. მადლობელი ვარ ყველას, ვინც ეხმარება ჩვენს ქვეყანას. დიდება ყველა ჩვენს მეომარს, ყველას, ვინც ამჟამად იბრძვის უკრაინისთვის“, – განაცხადა ვოლოდიმირ ზელენსკიმ.
