ქარსელაძე სტიქიის არეალში ვერტმფრენების ჩაფრენაზე: „არავითარ დაგვიანებას ადგილი არ ჰქონია"

ონის მუნიციპალიტეტის კურორტ შოვში მეწყრის ჩამოწოლის გამო დაწყებულ სამაშველო ღონისძიებებში სასაზღვრო პოლიციის ვერტმფრენის ჩართვის საკითხზე, ჟურნალისტებმა ჰკითხეს რაჭაში მყოფ ინფრასტრუქტურის მინისტრს, ირაკლი ქარსელაძეს. შეკითხვაზე, რა გახდა სტიქიის ზონაში ვერტმფრენების დაგვიანების მიზეზი, მან უპასუხა: „არ ვარ ვერტმფრენის სპეციალისტი, მაგრამ ყველაფერს და მათ შორის, ვერტმფრენსაც გააჩნია სამობილიზაციო პერიოდი. შეტყობინების შემოსვლიდან უმოკლეს ვადაში ამ სამობილიზაციო პერიოდის გათვალისწინებით, პირველი ვერტმფრენი იყო ადგილზე".

ქარსელაძე აცხადებს, რომ ვერტმფრენს არ დაუგვიანია. „არავითარ დაგვიანებას ადგილი არ ჰქონია, გამომდინარე იქიდან, რომ ყველაფერს გააჩნია თავისი ობიექტური დრო, ერთი. დაგვიანებაზე საუბარი საერთოდ უადგილოა, გამომდინარე იქიდან, რომ ადგილობრივი ბრიგადა, რომელიც უნდა გამოცხადებულიყო, მყისიერი იყო მისი გამოცხადება", - აღნიშნა მან.

ვერტმფრენების დაგვიანების თემაზე საგანგებო სიტუაციების მართვის სამსახურის უფროსმა თემურ მღებრიშვილმა განაცხადა: „ინფორმაცია ინციდენტის შესახებ შემოვიდა [3 აგვისტოს] 15:10-ზე, დაუყოვნებლივ დაიგეგმა ვერტმფრენების ჩართულობა. მოგეხსენებათ, ამას სჭირდება გარკვეული პერიოდი. გარდა ამისა, ამინდმაც შეგვიშალა გარკვეულწილად ხელი, თუმცა მფრინავების მართლაც, რომ გმირობის ფასად, შემოაღწია ხეობაში ვერტმფრენმა და დავიწყეთ ევაკუაცია მოსახლეობის".

თემურ მღებრიშვილის თქმით, რთული რელიეფის გათვალისწინებით, სტიქიის არეალში ღამით ვერტმფრენი იმაზე მეტ საქმეს ვერ გააკეთებს, ვიდრე - მეხანძრე-მაშველები.

„რაც შეეხება ვერტმფრენების ასეთ პერიოდში გამოყენებას, დამერწმუნეთ, ასეთ რთულ ხეობაში ღამით, რაც არ უნდა აღჭურვილი იყოს ვერტმფრენი, ძალიან გაჭირდებოდა, ეს იქნებოდა ძალიან არასწორი, რა თქმა უნდა, არაგამართლებული უსაფრთხოების მიზნით. რამეთუ იმაზე მეტ საქმეს, რასაც ადგილზე მეხანძრე-მაშველები აკეთებენ, დამერწმუნეთ, ვერტმფრენი ვერ გააკეთებს, გამომდინარე რთული რელიეფიდან", - განაცხადა მან.