იმდენად უშინაარსო და არაფრისმომცემი დოკუმენტია, ცალსახად აჩვენებს, რომ „ქართულ ოცნებას“ არ უნდა ევროკავშირში სრულფასოვანი წევრობა, - ასე ეხმაურება „სტრატეგია აღმაშენებლის“ ლიდერი, გიორგი ვაშაძე ევრორეკომენდაციების შესრულების საკითხზე მთავრობის სამოქმედო გეგმას.
როგორც ვაშაძემ აღნიშნა, აღნიშნული დოკუმენტი გადმოსცემს „ქართული ოცნების“ გზავნილს: „არ მინდა ევროკავშირი“.
„კანდიდატის სტატუსი მივიღეთ. ამ დოკუმენტს მალავდა ერთი თვე. რა შეიძლება ვუწოდოთ ამ დოკუმენტს? – პირდაპირ „ქართული ოცნების“ გზავნილი: „არ მინდა ევროკავშირი“. იმდენად უშინაარსო და არაფრისმომცემი დოკუმენტია, ცალსახად აჩვენებს, რომ „ქართულ ოცნებას“ არ უნდა ევროკავშირში სრულფასოვანი წევრობა. ამიტომ უნდა გავიმარჯვოთ არჩევნებში, სწრაფად გავატაროთ ნამდვილი რეფორმები, რომელიც დაჩქარებული წესით შეგვიყვანს ევროკავშირში. „გამარჯვების კოალიციის“ ამოცანა ეს არის. ახლა ბევრ საუბარს დაიწყებენ, მაგრამ მინდა ვთხოვო საზოგადოებას, უბრალოდ წაიკითხეთ, რამდენად უშინაარსო, აბსურდული დოკუმენტი გამოაქვეყნეს“, - აღნიშნა ვაშაძემ.
კითხვაზე, ჩაერთვება თუ არა სამუშაო ფორმატში, ვაშაძე განმარტავს, რომ „ქართული ოცნება“ აგრძელებს ევროინტეგრაციის საბოტაჟს და ვერ ხედავენ ნებას, რომ მეორე მხარეს უნდა ევროკავშირში გაწევრიანება.
„ჩვენ ამ დოკუმენტით ვერ ვხედავთ ნებას, რომ მეორე მხარეს უნდა ევროკავშირში გაწევრიანება. ჩვენს პოზიციაზე მსჯელობა გვექნება და საბოლოო გადაწყვეტილებას დავაფიქსირებთ. სამწუხარო ფაქტია, რომ „ქართული ოცნება“ აგრძელებს თავის დაწყებულ საბოტაჟს ევროინტეგრაციაზე. მათ არ უნდათ ევროკავშირი და ეს უშინაარსო დოკუმენტი სწორედ აღნიშნულზე მიუთითებს“, - აღნიშნა ვაშაძემ.
