დღეს, "ერთიანი ნაციონალური მოძრაობის" ცენტრალურ ოფისში ენმ-ს თავმჯდომარემ, ლევან ხაბეიშვილმა პარტიის ლიდერებთან ერთად, ეუთოს საპარლამენტო ასაბლეის შვედეთის დელეგაციას შეხვედრა გამართა.
ლევან ხაბეიშვილის განცხადებით, შეხვედრის ძირითადი თემა არჩევნებია. მთავარი ოპოზიციური პარტია პარტნიორებს გრძელვადიანი მისიის გამოგზავნის თხოვნით მიმართავს და არჩევნების გაყალბების რისკებზე მიუთითებს. პარტიის თავმჯდომარის განცხადებით, „ნაციონალური მოძრაობა“ და „გამარჯვების კოალიცია“ ყველაფერს გააკეთებს იმისთვის, რომ თითოეული მოქალაქის ხმა იყოს დაცული.
„ნაციონალურმა მოძრაობამ“ პარტნიორებთან საუბარი მიხეილ სააკაშვილის საკითხიც განიხილა. პარტიის თავმჯდომარის განცხადებით, მესამე პრეზიდენტის პოლიტმატიმრობა უნდა დასრულდეს, რადგან წარმოუდგენელია მთავარი პროდასავლელი ლიდერი იყოს ციხეში სანქცირებული მოსამართლეების და „ეფესბეს“ აგენტების მიერ და ამისთვის „ოცნებაზე“ დასავლეთის წნეხიც უნდა გაძლიერდეს.
“შვედების დელეგაციას ვხვდებით და მნიშვნელოვანია ჩვენი ქვეყნისთვის სადამკვირვებლო მისია 2024 წელს. ჩვენ ჩვენს პარტნიორებს, აბსოლუტურად ყველას მივწერეთ კონკრეტული წერილები იმის შესახებ, რომ გვჭირდება დახმარება არჩევნების დაკვირვების მიმართულებით, მათ შორის გრძელვადიანი და ეს არ უნდა იყოს მოკლედ ვადიანი, რადგან არჩევნები არჩევნების დღეს არ ყალბდება, რუსულ პარტიას უკვე დაწყებული აქვს არჩევნების გაყალბება, ამიტომ მნიშვნელოვანია ჩვენი პარტნიორების ჩართულობა, უნდა ესმოდეს საზოგადოებას, რომ „ნაციონალური მოძრაობა“, „გამარჯვების კოალიცია“ გააკეთებს ყველაფერს იმისთვის, რომ თითოეული ადამიანის ხმა იყოს დაცული და ეს უნდა ესმოდეს რუსულ პარტიასაც, რომ ვერანაირი ხელოვნური გაყალბება მათ ამ არჩევნებზე ვერ უშველის, ამიტომ ჩვენ ყველა მიმართულებით ძალ-ღონეს არ დავიშურებთ, რომ საქართველოში იყოს გრძელვადიანი სადამკვირვებლო მისიები და „რუსულ ოცნებას“ და ბიძინა ივანიშვილს მაქსიმალურად შეეშალოს ხელი გაყალბებაში. კონკრეტულ საარჩევნო უბნებზე ჩვენ იდენტიფიცირებული გვაქვს 300-მდე საარჩევნო უბანი, სადაც „ქართული ოცნება“ დაახლოებით 95 ათას ხმას მეტობაში აკეთებს, ამიტომ ცხადია ვაწვდით ამ კონკრეტულ ინფორმაციას მათ და ასევე, ცხადია ვისაუბრეთ პრეზიდენტ სააკაშვილის თავისუფლების მნიშვნელობაზე. იმ პირობებში, როდესაც ბიძინა ივანიშვილი ფორმალურადაც ამბობს, რომ ჩართულია საარჩევნო კამპანიაში, წარმოუდგენელია მთავარი პროდასავლელი ლიდერი „ეფესბეს“ აგენტურის მიერ და სანქცირებული მოსამართლეების მიერ იყოს ციხეში. შესაბამისად, მას საარჩევნო კამპანიაში შესაძლებლობა უნდა მიეცეს კამპანიაში ჩართულობის, მის ხალხთან შეხვედრის, კონკრეტული შეთავაზებების, პროგრამების განხორციელების და შესაბამისად, ქართველმა ხალხმა უნდა მიიღოს ეს გადაწყვეტილება და არ იყოს ისე, რომ რაღაცნაირად ბიძინა ივანიშვილს ყველანაირი პირობა ჰქონდეს შექმნილი იმისთვის, რომ მონაწილეობას იღებდეს, არაფორმალურად მართავდეს, ძარცვავდეს ამ ქვეყანას და მის მოწინააღმდეგეს არ ჰქონდეს უფლება , რომ მის ხალხს საარჩევნოდ სთხოვოს ხმა და სთხოვოს ევროპული მომავლისთვის გამარჯვება.“ - განაცხადა ლევან ხაბეიშვილმა
