ანაკლიის პორტთან დაკავშირებით რაც „ქართულმა ოცნებამ“ ჩაიდინა, ამის შემდეგ საერთოდ დასავლური, თავისუფალი სამყარო როგორ არ უნდა იყოს შეშფოთებული?! ეს შეეხება ვიზებსაც, ინვესტიციებსაც და სტრატეგიული პარტნიორობის გადახედვასაც, - ამის შესახებ „ლელოს“ ერთ-ერთმა ლიდერმა, დავით უსუფაშვილმა ჟურნალისტებს განუცხადა.
მისი შეფასებით, „ხელისუფლება თავისი უგუნური პოლიტიკით“, ქვეყნის სტრატეგიულ პარტნიორებთან ურთიერთობას საფრთხეს უქმნის.
„დღეს „ქართული ოცნების“ გამხმოვანებელმა მთავარმა ძალამ გვითხრა, მერე რაო, გაუქმდეს ყველაფერი, თუკი რამე პარტნიორობა გვაქვს აშშ-სთან და დასავლეთთანო, ჩვენ გადავარჩენთ ამ ქვეყანასო. აი, ასე უგუნურად მიაქანებს ეს ხალხი ამ ქვეყანას“, - განაცხადა უსუფაშვილმა.
მისი თქმით, ყველა ქვეყანა თავად წყვეტს, ვინ შეუშვას საკუთარ ქვეყანაში და ვინ არა.
„ელჩი პასუხისმგებელია ორ ქვეყანას შორის ურთიერთობაზე და თავისი ქვეყნის ინტერესების დაცვაზე. ჩვენი ქვეყანა რომ არ იცავს საკუთარი ქვეყნის ინტერესებს, ეს არის პრობლემა“, - განაცხადა უსუფაშვილმა.
