ევროპული საქართველოს პრაიმერიზი დასრულდა. პარტიის ერთ-ერთი ლიდერის, გიგი წერეთლის განცხადებით, მისი და აკაკი ბობოხიძის სიამ გაიმარჯვა და 1015 დელეგატის ხმა მიიღო.
რაც შეეხება N2 სიას, წერეთლის თქმით, 819 ხმა მიიღო.
კენჭისყრაში მონაწილეობა საქართველოს 38 მუნიციპალიტეტსა და ქალაქში მიიღეს.
"მეგობრებო, #ევროპული საქართველოს პრაიმერიზი დასრულდა. ეს პოზიტიურ ნაწილთან ერთად, გაცილებით დაძაბული,შრომატევადი და არასასიამოვნო ეპიზოდებით დატვირთული პროცესი აღმოჩნდა, ვიდრე წარმომედგინა...
ადრეც, სხვადასხვა ფორმის პრაიმერიზში მიმიღია მონაწილეობა შიდა თუ საერთაშორისო არჩევნებში, მაგრამ ჩვენი ვერსია სპეციფიკური აღმოჩნდა. ახლა დეტალებზე არ ვისაუბრებ.
შედეგი ცნობილია - N 1 სიამ, (რომელიც მე და აკაკი ბობოხიძემ წარვადგინეთ) გაიმარჯვა და 1015 დელეგატის ხმა მიიღო, ხოლო N 2 სიამ (ჩერგოლეიშვილი/ბოკერია) 819 ხმა. შემდგომში ორი კონკურენტი სია ერთიანდება შესაბამისი პროპორციით.
ძალიან დიდი მადლობა ყველა დელეგატს, ვინც კენჭისყრაში მიიღო მონაწილეობა საქართველოს 38 ქალაქსა და მუნიციპალიტეტში.
პატივს ვცემთ ყველას არჩევანს, თუმცა, განსაკუთრებული მადლობა ჩემი , N 1 სიის მხარდამჭერებს. (მათი არჩევანი, სრულიად მოულოდნელად და ხელოვნურად შექმნილი გარემოების გამო, კიდევ უფრო ღირებულია).
ახლა დაიწყება აქტიური საარჩევნო კამპანია და ოქტომბერში, ქვეყნის მომავლისთვის აუცილებელი ცვლილებები უნდა მოხდეს. აქვეა ინფორმაცია, რომელმა სიამ სად გაიმარჯვა:
სია #1 ქუთაისი, ზუგდიდი, გორი ,ხონი, ზესტაფონი, ჭიათურა, თერჯოლა, ბაღდათი, სამტრედია, წყალტუბო, ტყიბული, ოზურგეთი, ლანჩხუთი, მარტვილი, ჩხოროწყუ, ქარელი, ბორჯომი, ხაშური, ყვარელი, საგარეჯო, ლაგოდეხი, ახმეტა, წალკა, თეთრიწყარო, ქობულეთი, ხულო, მესტია, ლენტეხი.
სია #2 თბილისი, ბათუმი, ფოთი, რუსთავი, აბაშა, ხობი, გურჯაანი, ცაგერი"- წერს წერეთელი.
ევროპული საქართველოს პრაიმერიზი 28 ივლისს ჩატარდა. დელეგატებს შეეძლოთ ორ სიას შორის გაეკეთებინათ არჩევანი. 2024 წლის საპარლამენტო არჩევნებზე საარჩვნო სია პრაიმერიზის შედეგების მიხედვით შედგება.
