აშშ-ის სახელმწიფო მდივანმა, ენტონი ბლინკენმა კოლეგებს „დიდი შვიდეულის“ ქვეყნებიდან განუცხადა, რომ ირანისა და „ჰეზბოლას“ მხრიდან ისრაელის წინააღმდეგ თავდასხმა, შესაძლოა, ორშაბათს დაიწყოს, - ინფორმაციას Axios-ი სატელეფონო ზარის შესახებ ინფორმირებულ სამ წყაროზე დაყრდნობით ავრცელებს.
გამოცემის ცნობით, ენტონი ბლინკენი ახლო მოკავშირეებთან სატელეფონო საუბრით შეეცადა დიპლომატიური ზეწოლა მოეხდინა ირანსა და „ჰეზბოლაზე“ მათი მხრიდან შურისძიების მაქსიმალურად შემცირების მიზნით. აშშ-ის სახელმწიფო მდივნის თქმით, მათი დარტყმების გავლენის შეზღუდვა საუკეთესო შანსია ყოვლისმომცველი ომის თავიდან ასაცილებლად.
წყაროების ცნობით, ბლინკენმა განაცხადა, რომ შეერთებულმა შტატებმა არ იცის თავდასხმის ზუსტი დრო, მაგრამ მიიჩნევს, რომ ის შეიძლება დაიწყოს მომდევნო 24-48 საათის განმავლობაში, ანუ უკვე ორშაბათს.
შეგახსენებთ, ირანი და მისი ლიბანელი მოკავშირე “ჰეზბოლა” თეირანში „ჰამასის“ პოლიტიკური ლიდერის, ისმაილ ჰანიესა და ბეირუთში „ჰეზბოლას“ სამხედრო მეთაურის ფუად შუკრის მკვლელობებში ისრაელს ადანაშაულებენ და საპასუხო ქმედებებით იმუქრებიან.
