საფრანგეთის პრეზიდენტმა ემანუელ მაკრონმა პრემიერ-მინისტრის თანამდებობაზე მემარცხენეების კანდიდატის დანიშვნაზე უარი განაცხადა, - ამის შესახებ ინფორმაციას სააგენტო „ფრანს-პრესი“ ელისეის სასახლეზე დაყრდნობით ავრცელებს.
ელისეის სასახლის განცხადებაში აღნიშნულია, რომ საფრანგეთის პრეზიდენტმა, ემანუელ მაკრონმა ქვეყნის პრემიერ-მინისტრის თანამდებობაზე ლუსი კასტეს დანიშვნაზე უარი თქვა და ხვალ, 27 აგვისტოს პარტიებთან ახალ კონსულტაციებს დაიწყებს.
ემანუელ მაკრონის განცხადებით, „ინსტიტუციური სტაბილურობის“ სახელით „ახალი სახალხო ფრონტის“ პრემიერ-მინისტრის დანიშვნას გამორიცხავს.
„ჩემი პასუხისმგებლობაა, რომ ქვეყანა არ იყოს ბლოკირებული ან დასუსტებული. მმართველმა პოლიტიკურმა პარტიებმა არ უნდა დაივიწყონ ის გამონაკლისი გარემოებები, რომლითაც მათი დეპუტატები საპარლამენტო არჩევნების მეორე ტურში აირჩიეს“, - აღნიშნა საფრანგეთის პრეზიდენტმა.
საფრანგეთის პრეზიდენტმა მემარცხენე ბლოკს „სხვა პოლიტიკურ ძალებთან თანამშრომლობისკენ“ მოუწოდა.
შეგახსენებთ, საფრანგეთის ეროვნული ასამბლეის არჩევნებში მემარცხენე პარტიების კოალიციამ, „ახალმა სახალხო ფრონტმა“ გაიმარჯვა, პრეზიდენტ ემანუელ მაკრონის კოალიცია მეორე ადგილზე გავიდა, ულტრამემარჯვენე „ეროვნული გაერთიანება“ კი - მესამეზე. ეროვნულ ასამბლეაში აბსოლუტური უმრავლესობისთვის საჭირო მანდატების რაოდენობა არცერთ პარტიულ ჯგუფს არ აქვს.
