ამერიკის შეერთებული შტატების პრეზიდენტის, ჯო ბაიდენის განცხადებით, მისი ადმინისტრაცია სწორედ ახლა მუშაობს უკრაინის მიერ რუსეთთან ომში შორ მანძილზე მოქმედი იარაღის გამოყენებაზე შეზღუდვების მოხსნის საკითხზე, - ინფორმაციას Reuters-ი ავრცელებს.
კერძოდ, კითხვაზე, მოხსნის თუ არა აშშ შეზღუდვებს უკრაინის მიერ რუსეთის წინააღმდეგ ომში შორ მანძილზე მოქმედი იარაღის გამოყენებაზე, ჯო ბაიდენმა უპასუხა, რომ მისი ადმინისტრაცია ამ საკითხს „ახლა ამუშავებს“.
სააგენტო წერს, რომ შეერთებულ შტატებს არ სურს მიაწოდოს ან დაუშვას იარაღის გამოყენება, რომელსაც რუსეთის ტერიტორიის სიღრმეში დარტყმის მიყენება შეუძლია, რადგან ვაშინგტონი შიშობს, რომ ეს კონფლიქტის ესკალაციას გამოიწვევს.
„კიევის სხვა მოკავშირეები აწვდიან იარაღს, მაგრამ შეზღუდვებით იმასთან დაკავშირებით, თუ როგორ და როდის შეიძლება მათი გამოყენება რუსეთის ტერიტორიაზე, იმ შიშიდან გამომდინარე, რომ ასეთმა დარტყმებმა შეიძლება შურისძიების პროვოცირება მოახდინოს, რაც ნატო-ს ქვეყნებს ომში ჩაითრევს, ან ბირთვული კონფლიქტის პროვოცირებას გამოიწვევს“, - წერს Reuters-ი.
