დონალდ ტრამპი კამალა ჰარისთან მორიგ დებატებში მონაწილეობას აღარ მიიღებს, ჰარისის გუნდი დებატებს ითხოვს

დონალდ ტრამპი აცხადებს, რომ კამალა ჰარისთან მორიგ დებატებში მონაწილეობას აღარ მიიღებს. ამის შესახებ აშშ-ის პრეზიდენტობის კანდიდატმა თავის სოციალურ ქსელში, Truthsocial-ში დაწერა.

მისი თქმით, გამოკითხვები აჩვენებს, რომ მან დამაჯერებლად გაიმარჯვა კამალა ჰარისთან გამართულ პირველ დებატებში.

„გამოკითხვები ნათლად აჩვენებს, რომ მე მოვიგე დებატები კამალა ჰარისის წინააღმდეგ და მან მაშინვე მოითხოვა მეორე დებატები. ჰარისმა და თაღლითმა ჯომ გაანადგურეს ჩვენი ქვეყანა, მილიონობით კრიმინალი შემოდის შეერთებულ შტატებში, ინფლაციამ გააკოტრა ჩვენი საშუალო კლასი. ეს ყველამ იცის და კამალასა და ჯოს მიერ გამოწვეული ყველა სხვა პრობლემა დეტალურად განვიხილე ჯოსთან პირველი დებატების დროს და ჰარისთან მეორე დებატების დროს. კამალამ ყურადღება უნდა გაამახვილოს იმაზე, თუ რა უნდა გაეკეთებინა ბოლო თითქმის ოთხი წლის განმავლობაში. მესამე დებატები არ იქნება!“ – წერს ტრამპი.

მას შემდეგ, რაც დონალდ ტრამპმა განაცხადა, რომ კამალა ჰარისთან მორიგ დებატებში მონაწილეობას აღარ მიიღებს, ჰარისის გუნდმა დებატების ჩატარება მოითხოვა. აღნიშნულის შესახებ კამალა ჰარისის საარჩევნო კამპანიამ სოციალურ ქსელში დაწერა.

„ჩვენ ვალდებული ვართ, ამომრჩევლებისთვის მორიგი დებატები ჩავატაროთ“, – აღნიშნულია განცხადებაში.