უკრაინის ტერიტორიული მთლიანობა არასოდეს ყოფილა და არც იქნება განხილვის ან კომპრომისის საგანი. ყირიმი უკრაინაა, წერტილი! - ასე ეხმაურება უკრაინის საგარეო საქმეთა სამინისტრო ყირიმის ავტონომიური რესპუბლიკისა და ქალაქ სევასტოპოლის მომავალ სტატუსთან დაკავშირებით წინადადებებს.
„უკრაინის მხარეს დგანან ჩვენი თავდაცვის ძალები, ჩვენი საერთაშორისო პარტნიორები, გაერო-ს წესდება და საერთაშორისო სამართალი. ყირიმი არის ევროპის უსაფრთხოების არქიტექტურის სიმძიმის ცენტრი. მისი სრული აღდგენა შესაძლებელია მხოლოდ უკრაინის მთელი ტერიტორიის სრული დეოკუპაციის გზით, უკრაინის ნახევარკუნძულის ჩათვლით“, - აღნიშნულია განცხადებაში.
უკრაინის საგარეო უწყების განმარტებით, კიევს პარტნიორების ძლიერი მხარდაჭერის გაგრძელების იმედი აქვს, რათა აიძულონ რუსეთი დაუბრუნდეს საერთაშორისო სამართლისა და გაერო-ს წესდების პატივისცემას, გაიყვანოს ჯარები და სამხედრო ტექნიკა უკრაინის მთელი სუვერენული ტერიტორიიდან, აღდგეს უკრაინის ტერიტორიული მთლიანობა, რუსეთმა პასუხი აგოს უკრაინის წინააღმდეგ ჩადენილი აგრესიისა და ყველა დანაშაულისთვის.
„ყველა ძალისხმევა მიმართული უნდა იყოს ამ მიზნების რაც შეიძლება მალე მიღწევაზე და არა კრემლის მადის დაკმაყოფილებაზე, ამა თუ იმ გზით, უკრაინის ინტერესებისა და საერთაშორისო სამართლის ხარჯზე. მშვიდობის ფორმულის ფარგლებში, უკრაინის პრეზიდენტმა წარმოადგინა მკაფიო ხედვა უკრაინისა და მსოფლიოსთვის ყოვლისმომცველი, სამართლიანი და ხანგრძლივი მშვიდობის მისაღწევად. ჩვენ ვიწვევთ ყველას, ვინც პატივს სცემს საერთაშორისო კანონს და გაერო-ს წესდებას, შემოუერთდეს მშვიდობის ფორმულის განხორციელებას, როგორც ერთადერთ გზას ევროპაში სამართლიანი და ხანგრძლივი მშვიდობის აღდგენისკენ“, - აღნიშნულია განცხადებაში.
შეგახსენებთ, პოლონეთის საგარეო საქმეთა მინისტრი, რადოსლავ სიკორსკი რეფერენდუმის მომზადების მიზნით ყირიმის გაერო-ს მანდატის ქვეშ გადაცემის ინიციატივით გამოვიდა. აღსანიშნავია, რომ საგარეო საქმეთა სამინისტროს განცხადებაში არ არის ნახსენები სიკორსკი და არც ის, თუ კონკრეტულად ვინ ცდილობს ყირიმის სტატუსის განხილვას.
