ზუგდიდში, ჩვენს წარმომადგენელს ფიზიკურად გაუსწორდნენ - ჩვენ სასწრაფოდ მოვითხოვთ აღნიშნულ ფაქტზე რეაგირებას და არ დავტოვებთ არც ერთ დარღვევას შესაბამისი სამართლებრივი რეაგირების გარეშე, - ამის შესახებ „ძლიერი საქართველოს“ ერთ-ერთმა ლიდერმა, ანა ნაცვლიშვილმა ბრიფინგზე განაცხადა.
მან საარჩევნო უბნებზე არსებულ შესაძლო დარღვევებზე ისაუბრა და აღნიშნა, რომ ამ ეტაპზე ყველაზე მეტად გავრცელებული დარღვევა არის ამომრჩევლისთვის ორი ბიულეტენის მიცემა.
მისივე თქმით, რამდენიმე უბანზე შეინიშნება დამკვირვებლებისთვის და მედიის წარმომადგენლებისთვის არასათანადო გარემოს შექმნის და ხელის შეშლის ფაქტები.
ნაცვლიშვილი საარჩევნო კომისიებს მოუწოდებს, შეასრულონ თავიანთი კანონისმიერი ვალდებულებები და უზრუნველყონ საარჩევნო პროცესის, კანონიერად, მშვიდ გარემოში ჩატარება.
„გათენდა 26 ოქტომბერი, საქართველოს დიდი გამარჯვების დღე რუს ოლიგარქზე. მინდა მადლობა ვუთხრა საქართველოს თითოეულ მოქალაქეს, რომელიც მივიდა უკვე უბანზე ხმის მისაცემად. უპრეცედენტო აქტიურობა არის თბილისში, აქტიურობა არის ასევე სხვადასხვა ქალაქებში. დასავლეთ საქართველოში ძლიერი წვიმის მიუხედავად, ადამიანები დილიდან მიდიან ხმის მისაცემად და თითოეულს მინდა მადლობა ვუთხრა და მოვუწოდო მოქალაქეებს, რომ გამოიყენონ საარჩევნო ხმის უფლება საქართველოს გადასარჩენად.
„ძლიერი საქართველოს“ შტაბი მუშაობს სრული დატვირთვით. ჩვენ წარმომადგენლები გვყავს საქართველოს ყველა საარჩევნო უბანზე. ვაკვირდებით ხმის მიცემის პროცესს და რეაგირებას ვახდენთ თითოეულ დარღვევაზე. ჩვენ დავიცავთ საქართველოს თითოეული მოქალაქის ხმას რუსი ოლიგარქისგან.
ამ ეტაპზე დაფიქსირებულია რამდენიმე დარღვევა, რაზეც ჩვენ მოვახდინეთ რეაგირება. ეს არის ქუთაისში 59-ე ოლქის მე-11 და მე-17 უბნებზე, მთაწმინდის 1-ელი ოლქის მე-16, 31-ე და მე-11 უბანზე. ჩუღურეთში 22-ე უბანზე, გორში 32-ე ოლქის 59-ე უბანზე, ვაკეში მე-8 უბანზე. ამ ეტაპზე ყველაზე მეტად გავრცელებული დარღვევა არის ამომრჩევლისთვის ორი ბიულეტენის მიცემა, რაც არის დარღვევა. ჩვენ ყველაფერს აღვნუსხავთ და მოვახდენთ შესაბამის რეაგირებას. ასევე, მინდა გითხრათ, რომ ქუთაისში 72-ე სპეცუბანზე, ეს არის პენიტენციური დაწესებულება, „ძლიერი საქართველოს“ დამკვირვებელი სამი საათის დაგვიანებით შეუშვეს, ეს არის დარღვევა. რამდენიმე უბანზე შეინიშნება დამკვირვებლებისთვის, ასევე, მედიის წარმომადგენლებისთვის, არასათანადო გარემოს შექმნის და ხელის შეშლის ფაქტები.
მოვუწოდებთ საარჩევნო კომისიებს, დაემორჩილონ საქართველოს კანონს, შეასრულონ თავიანთი კანონისმიერი ვალდებულებები და უზრუნველყონ საარჩევნო პროცესის კანონიერად მშვიდ გარემოში ჩატარება. ასევე, ახლა მაწვდიან ინფორმაციას, რომ ჩვენს წარმომადგენელს ფიზიკურად გაუსწორდნენ ზუგდიდში, ჩვენ სასწრაფოდ მოვითხოვთ აღნიშნულ ფაქტზე რეაგირებას და არ დავტოვებთ არც ერთ დარევას შესაბამისი სამართლებრივი რეაგირების გარეშე“, - განაცხადა ნაცვლიშვილმა
