„კოალიცია ცვლილებისთვის“ არის მნიშვნელოვნად წინ, ვიდრე სხვა გაერთიანებები, მაგრამ მთავარია, ოთხივე გაერთიანებამ შეძლო ბარიერის გადალახვა, – ამის შესახებ „კოალიცია ცვლილებისთვის“ ერთ-ერთმა ლიდერმა, ნიკა მელიამ განაცხადა.
მისი თქმით, ქართველმა ხალხმა ცვლილებებს დაუჭირა მხარი.
„გამარჯვება საქართველოს. უპრეცედენტო აქტივობაა, თქვენ ეს შეძელით. ეს მაჩვენებელი უტოლდება 2012 წლის აქტივობას. ცვლილებები უკვე დადგა, „ქართული ოცნება“ უკვე არის საპარლამენტო უმცირესობაში. ის 40%-ზე ქვემოთაა. სრული პასუხისმგებლობით ვამბობ, ის არის საპარლამენტო ოპოზიციაში. ოთხივე პოლიტიკური მსხვილი გაერთიანება ბარიერს ლახავს ბარიერს, ვულოცავ თითოეული მათგანის მხარდაჭერსა და გულშემატკივარს, მათ ეს შეძლეს. ქედმაღლობაში არ ჩამითვალოთ, მაგრამ „კოალიცია ცვლილებისთვის“ საარჩევნო ნომერით 4, არის მნიშვნელოვნად წინ, ვიდრე სხვა გაერთიანებები, მაგრამ მთავარია, ოთხივე გაერთიანებამ შეძლო ბარიერის გადალახვა.
ათასობის ჩვენი კოალიციის დამკვირვებელი ახლა იბრძვის ქართველი ხალხის არჩევანის დასაცავად, მათ მთელი დღის განმავლობაში მოუწიათ უთანასწორო პირობებში ქართველი ხალხის არჩევანის დაცვა, ამიტომ მადლობა აბსოლუტურად უმრავლესობას, რომ არ აჰყვნენ „ქართული ოცნების“ პროვოკაციებს. „ქართული ოცნების“ მთავარი ჩანაფიქრი იყო, ჩვენი დამკვირვებლები გამოეყვანათ მდგომარეობიდან.
დღევანდელი დღით დადასტურდა, რომ ბიძინა ივანიშვილი ქართველ ხალხს არ უკურთხებია მეფედ და არც ცეკას მდივნად აურჩევია. ქართველმა ხალხმა ცვლილებებს დაუჭირა მხარი. შესაძლებელია, „კოალიცია ცვლილებებზე“ ბევრს დიდი წარმოდგენა არ ჰქონოდა, მაგრამ ცვლილებებს დაუჭირეს მხარი“, – განაცხადა მელიამ.
