გაიძვერა ხელისუფლება უნდა დავამარცხოთ - გია ბუღაძე

მხატვარი გია ბუღაძე ფიქრობს, რომ ქვეყნის ევროპული მომავლისთვის ბრძოლაში საზოგადოების აქტიურობა ძალიან მნიშნელოვანია. ხელოვანის თქმით, დღეს დაანონსებულ აქციაზე ყველა უნდა მივიდეს, რადგან ეს კიდევ ერთხელ ცხადყოფს, რომ ქართველი ხალხი სიყალბეს და გაიძვერობას არ შეეგუება. 

"კიდევ ერთი საშუალება იქნება, შევხვდეთ ერთმანეთს, დაველაპარაკოთ, თანაგრძნობა და სოლიდარობა გამოვხატოთ და საერთოდ, საქართველოსთვის ვიბრძოლოთ. აქტივობა აუცილებელია, აქტივობის გარეშე არაფერი გამოვა. დღეს ეს გვაძლევს საშუალებას, კიდევ ერთხელ დავამტკიცოთ, რომ ჩვენ არ ვიღებთ სიყალბეს, ტყუილს არ ვიღებთ, არ ვიღებთ გაიძვერობას და ღალატს და ჩვენ ერთად ვართ, რათა დავამარცხოთ ეს გაიძვერა ხელისუფლება, - ამბობს გია ბუღაძე. 

შეგახსენებთ, რომ რამდენიმე საათში მოვლენების ეპიცენტრი დედაქალაქის ცენტრალური გამზირი კიდევ ერთხელ გახდება. "უთხარი არა გაყალბებულ არჩევნებს და დაიბრუნე შენი ხმა!" - ამ შინაარსის საპროტესტო აქცია პარლამენტის წინ ზუსტად 19:00 საათზე დაიწყება.

აქცია სადამკვირვებლო მისია "ჩემი ხმის" ორგანიზებულია.