„ძლიერმა საქართველომ“ ე.წ. პარლამენტს მანდატების გაუქმების მოთხოვნით ოფიციალურად მიმართა.
კერძოდ, პოლიტიკური ლიდერების ინდივიდუალური განცხადებები, მანდატების დათმობის შესახებ, საქრთველოს ე.წ. პარლამენტში „ძლიერი საქართველოს“ ლიდერებმა წარადგინეს.
როგორც ერთ-ერთმა ლიდერმა, ლევან ცუცქირიძემ განმარტა, ამ პარლამენტს არ უნდა ჰქონდეს ლეგიტიმაცია.
„ამ პარლამენტს ლეგიტიმაცია არ უნდა ჰქონდეს არც ქვეყნის შიგნით და არც ქვეყნის გარეთ. ის შედეგები, რომლის საფუძველზეც შეიკრიბა ეს თვითგამოცხადებული ჯგუფი ამ შენობაში, რეალური არჩევნების არ არის. რას გააკეთებს „ქართული ოცნება“ არ ვიცი, კარგს არაფერს“, - აღნიშნა ცუცქირიძემ.
ცნობისთვის, ცენტრალურმა საარჩევნო ადმინისტრაციამ რეგისტრაცია უკვე გაუუქმა პოლიტიკური გაერთიანებების -„კოალიცია ცვლილებისთვის გვარამია მელია გირჩი დროას“, „ერთიანობა-ნაციონალური მოძრაობის“ და „ძლიერი საქართველო-ლელო, ხალხისთვის, თავისუფლებისთვის“ პარტიული სიით წარდგენილ დარჩენილ კანდიდატებს. „კოალიციამ ცვლილებისთვის“ საქართველოს პარლამენტს მანდატების დატოვებასთან დაკავშირებით ოფიციალურად უკვე მიმართა. პარლამენტში „კოალიცია ცვლილებისთვის“ მანდატის მქონე 19-ვე წევრი მივიდა და განცხადება ინდივიდუალურად დაწერა. ამასთან, როგორც ცნობილია სადეპუტატო მანდატის გაუქმების შესახებ პარლამენტს უკვე მიმართა „ერთიანობა ნაციონალური მოძრაობის“ ერთ-ერთმა ლიდერმა გიორგი ვაშაძემ.
