გერმანიაში, საშობაო ბაზრობაზე ავტომობილის შევარდნის შედეგად დაღუპულთა რაოდენობა გაიზარდა

გერმანიაში, საშობაო ბაზრობაზე ავტომობილის შევარდნის შედეგად დაღუპულთა რიცხვი ოთხამდე გაიზარდა, - ამის შესახებ ინფორმაციას სააგენტო Reuters-ი გერმანულ გამოცემა Bild-ზე დაყრდნობით ავრცელებს.

გერმანელი ოფიციალური პირების ცნობით, დაღუპულებს შორის ერთი ბავშვია.

მაგდებურგში, სადაც პარასკევს საღამოს ავტომობილი საშობაო ბაზრობაზე შევარდა, დღეს გერმანიის კანცლერი, ოლაფ შოლცი ჩავა.

ცნობისთვის, გერმანიის ქალაქ მაგდებურგში, საშობაო ბაზრობაზე თავდასხმის შედეგად, 60-ზე მეტი ადამიანი დაშავდა.

გერმანული გამოცემა Spiegel-ი წერს, რომ პოლიციამ ავტომობილის მძღოლი, 50 წლის ტალებ ა. დააკავა, ექიმი, მეზობელი ქალაქ ბერნბურგიდან. იგი საუდის არაბეთში დაიბადა და გერმანიაში პირველად 2006 წელს ჩავიდა. გამოცემის ცნობით, ეჭვმიტანილი ისლამისტი არ არის და სოციალურ ქსელში ულტრამემარჯვენე პარტია „ალტერნატივა გერმანიისთვის“ მხარდაჭერას გამოხატავდა.

ამასთან, Reuters-ს საუდელმა წყარომ განუცხადა, რომ საუდის არაბეთმა გერმანიის ხელისუფლება თავდამსხმელის ექსტრემისტული შეხედულებების შესახებ გააფრთხილა, რომელსაც იგი სოციალურ პლატფორმა X-ზე წერდა.