ოკუპირებულ აფხაზეთში, რიწისკენ მიმავალ გზაზე, კლდის ფერდობზე ცეცხლის მცირე კერები შენიშნეს. ადგილობრივი მედიასაშუალება „ЧП Абхазия“ თვითმხილველის მიერ გადაღებულ ვიდეოს ავრცელებს და წერს, რომ შემთხვევა რიწისკენ მიმავალი გზის დაახლოებით მე-20 კილომეტრზე, მეორე გვირაბთან დაფიქსირდა.
მედიასაშუალების ცნობით, თვითმხილველი აცხადებს, რომ კლდეზე მცირე ალები უკვე მეორე დღეა პერიოდულად ჩნდება და მალევე ქრება. მისი თქმით, კლდის მხრიდან აღნიშნულ ადგილთან მიახლოება რთულია.
„ჩვენი აზრით, ეს ლავის დასაწყისია, კერა იხსნება. ჩვენი მთები ძალიან ახალგაზრდაა, მაგრამ ვფიქრობ, ყველა ნიშნით ეს ძალიან ჰგავს ლავას“, - აცხადებს ვიდეოს ავტორი.
„ЧП Абхазия“ პუბლიკაციას კითხვითი ფორმის სათაურით, „ვულკანი რიწისკენ მიმავალ გზაზე?“ ავრცელებს.
ამ ეტაპზე არ ვრცელდება სპეციალისტების ან შესაბამისი სამსახურების ოფიციალური დასკვნა, რომელიც დაადასტურებდა, რომ კლდეზე დაფიქსირებული ცეცხლი ვულკანურ პროცესს ან ლავის ამოსვლას უკავშირდება. შესაბამისად, ლავის შესახებ ინფორმაცია მხოლოდ თვითმხილველის ვარაუდია.
