პოლიტიკოსი და უსაფრთხოების საკითხების ექსპერტი კოტე კემულარია აცხადებს, რომ აშშ-ის პრეზიდენტმა დონალდ ტრამპმა სახელმწიფო მდივანი მარკო რუბიო ეროვნული უსაფრთხოების საკითხებში პრეზიდენტის მრჩევლად ოფიციალურად დანიშნა. კემულარიას თქმით, რუბიო ამ თანამდებობას აქამდე დროებით ითავსებდა.
კემულარია აღნიშნავს, რომ სახელმწიფო მდივნისა და ეროვნული უსაფრთხოების მრჩევლის ფუნქციების ერთდროულად შესრულება აშშ-ის მმართველობის სისტემისთვის უჩვეულოა. ისტორიულ მაგალითად მას ჰენრი კისინჯერი მოჰყავს, რომელიც ორივე თანამდებობას ერთდროულად იკავებდა.
კემულარიას შეფასებით, ეროვნული უსაფრთხოების მრჩევლის თანამდებობაზე რუბიოს ოფიციალური დანიშვნა მის გავლენას გაზრდის. ექსპერტი ასევე მიიჩნევს, რომ რუბიოს რუსეთის მიმართ მკაცრი პოზიცია აქვს და მისი გაძლიერება მოსკოვის ინტერესებში არ შედის.
„ზოგადად, ეს პოზიტიური ამბავია, ვინაიდან მარკო რუბიო ნამდვილად არის ძალიან გამოცდილი, გამორჩეულად დაბალანსებული დიპლომატი და პოლიტიკოსი“, - წერს კემულარია.
