„სოციალური სამართლიანობის ცენტრი“ გორში აქტივისტის, ვახტანგ ფირცხელაურის გატაცებასთან და ცემასთან დაკავშირებით მოუწოდებს შსს-ს, სწრაფად, ობიექტურად და ეფექტიანად გამოიძიოს საქმე.
26 იანვარს ვახტანგ ფირცხელაურმა განაცხადა, რომ სამმა ნიღბიანმა ფურგონის საბარგულით გაიტაცა, გაძარცვა და სცემა. ფიცხელაური თავდასხმას სწორედ მისი აქტივიზმის, მათ შორის, ბოლოდროინდელ დემონსტრაციებში მონაწილეობის გამო ანგარიშსწორებად მიიჩნევს. შსს გამოძიებას ჯგუფური ძალადობის მუხლით აწარმოებს.
სოციალური სამართლიანობის ცენტრის განცხადებით, აქტივისტებზე კერძო პირების მხრიდან ორგანიზებული თავდასხმის პრაქტიკა ჩანს სხვა საქმეებთან დაკავშირებითაც.
„2024 წლის გაზაფხულზე „რუსული კანონის“ საწინააღმდეგო აქციებიდან დღემდე სამოქალაქო აქტივისტების/პოლიტიკოსების ცემის, ჩასაფრების და გატაცების არაერთი ფაქტი დაფიქსირდა. ყველა შემთხვევაში ადამიანებს რამდენიმე პირისგან შემდგარი ჯგუფები უპირისპირდებოდნენ, ძალადობა უმეტესად დაზარალებულების საცხოვრებელ სახლებთან, სამუშაო ადგილებზე ან სხვა საჯარო სივრცეებში დემონსტრაციულად ხდებოდა.
ოპოზიციონერებზე და აქტივისტებზე თავდასხმის ათეულობით შემთხვევა გვაფიქრებინებს, რომ ხელისუფლებამ სწორედ ე.წ „ტიტუშკების“ პრაქტიკა გამოიყენა. ძალადობის აღნიშნული ეპიზოდების ჩადენის დრო, სცენარები და ტაქტიკა პრაქტიკულად ემთხვეოდა ერთმანეთს და კარგად ორგანიზებულს ჰგავდა. განსაკუთრებით საეჭვო იყო ის, რომ ამ ჯგუფებმა იცოდნენ კონკრეტული პირების საცხოვრებელი მისამართები და მათი გადაადგილების ზუსტი დრო.
ცხადია, რომ ამგვარი ძალადობის წახალისებით „ქართული ოცნების“ მიზანი ოპოზიციური პოლიტიკოსებისა და ხელისუფლების მიმართ კრიტიკული აქტივისტების დაშინება და მათი წინააღმდეგობის ჩახშობაა. ასევე ნათელია, რომ ამას ოპონენტების დამცირებისა და უფრო ფართო საზოგადოების დაშინებისა და გაჩუმების ამოცანაც აქვს.
ხელისუფლების მხრიდან ძალადობრივი ჯგუფის მიმართ გამოხატული სამართლებრივი და პოლიტიკური ლოიალობა და მათი დაუსჯელობა შემაშფოთებელია და ზრდის ახალი ძალადობრივი შემთხვევების რისკებს.
აღნიშნულის გათვალისწინებით, სოციალური სამართლიანობის ცენტრი მოუწოდებს:
საქართველოს შინაგან საქმეთა სამინისტროს:
- უზრუნველყოს ყოველმხრივი, სრული და ობიექტური გამოძიების წარმოება ვახტანგ ფიცხელაურის მიმართ ძალადობრივი ჯგუფის წევრების მხრიდან ჩადენილი გატაცებისა და ფიზიკური ანგარიშსწორების ფაქტზე;
- დაუყოვნებლივ უზრუნველყოს დამნაშავე პირების სწრაფი იდენტიფიცირება და მათ მიმართ მყისიერი სამართლებრივი ზომების მიღება;
- გამოძიების პროცესში განუხრელად დაიცვას დაზარალებულის სამართლებრივი ინტერესები.
საქართველოს პროკურატურას
- უზრუნველყოს საქმეზე “პოლიტიკური და სხვა შეხედულების ქონის გამო” სიძულვილის მოტივის გამოკვეთა და გამოძიების პროცესის ჯეროვანი ზედამხედველობა;
- მიმდინარე გამოძიებების ფარგლებში, შეისწავლოს პოლიტიკოსებზე და აქტივისტებზე მსგავსი თავდასხმის ორგანიზატორებსა და ჯგუფებს შორის შესაძლო კავშირები და მათი ორგანიზების, დაქირავებისა და მართვის სქემები.
მიმდინარე გამოძიების ფარგლებში ვახტანგ ფიცხელაურის ინტერესებს სოციალური სამართლიანობის ცენტრი იცავს და გამოძიებას მიმდინარეობის შესახებ საზოგადოებას ინფორმაციას პერიოდულად მივაწვდით“, – აცხადებს ორგანიზაცია.
