ევროკომისიის საგარეო საქმეთა პოლიტიკის სპიკერი - მოვუწოდებთ საქართველოს ხელისუფლებას, შეწყვიტოს სამოქალაქო საზოგადოების, ჟურნალისტების, პოლიტიკური ოპოზიციის დაშინება - ეს სირცხვილია და უნდა შეწყდეს!
18.02.2025 ნახვები: 307
ჩვენ მოვუწოდებთ [საქართველოს] ხელისუფლებას, შეწყვიტოს ყველანაირი დაშინება სამოქალაქო საზოგადოების, ჟურნალისტების, პოლიტიკური ოპოზიციის წინააღმდეგ. ეს სირცხვილია და უნდა შეწყდეს, - ამის შესახებ ევროკომისიის საგარეო საქმეთა და უსაფრთხოების პოლიტიკის სპიკერმა ანიტა ჰიპერმა ბრიუსელში, „ინტერპრესნიუსის“ სპეციალურ კორესპონდენტს განუცხადა.
საქართველოს მე-5 პრეზიდენტის, სალომე ზურაბიშვილისა და ოპოზიციის ერთ-ერთი ლიდერის, გიორგი გახარიას მიმართ კვერცხების სროლის ფაქტზე კომენტირებისას სპიკერმა განაცხადა, რომ ევროკომისიის პასუხი საქართველოს ხელისუფლებასთან კონტაქტების შემცირება და მათთვის ფინანსური დახმარების გაყინვაა.
„როცა საქმე ეხება საქართველოს და მის დემოკრატიულ უკუსვლას, ჩვენ გვქონდა მკაფიო პასუხი, იქნება ეს [ხელისუფლებასთან] პოლიტიკური კონტაქტების შემცირებით, ფინანსური დახმარების გაყინვით, თუ სამოქალაქო საზოგადოების მხარდაჭერით. უფრო მეტიც, ჩვენ მოვუწოდებთ ხელისუფლებას, შეწყვიტოს ყველანაირი დაშინება სამოქალაქო საზოგადოების, ჟურნალისტების, პოლიტიკური ოპოზიციის წინააღმდეგ. ეს სირცხვილია და უნდა შეწყდეს!“ - განაცხადა ანიტა ჰიპერმა.
შეგახსენებთ, რომ მიუნხენის კონფერენციიდან დაბრუნებულ გიორგი გახარიასა და სალომე ზურაბიშვილს, თბილისის საერთაშორისო აეროპორტში კვერცხები ესროლეს.
