მინდა მკაფიოდ ვთქვა, რომ მზია ამაღლობელი აღკვეთის ღონისძიების სახით არ იმსახურებს პატიმრობას, - ასე მიმართა ადვოკატმა თამარ კორძაიამ მოსამართლე სალიხ შაინიძეს, რომელიც „ბათუმელებისა“ და „ნეტგაზეთის“ დამფუძნებლის მზია ამაღლობელის ადმინისტრაციულ სამართალდარღვევის საქმეს განიხილავს.
მზია ამაღლობელი ადვოკატ თამარ კორძაიასთან ერთად, დისტანციურად ესწრება სასამართლო პროცესს. დღევანდელი პროცესი კი ეხება 11 იანვარს მომხდარს, როდესაც მზია ამაღლობელი პოლიციამ პირველ ჯერზე, ადმინისტრაციული წესით დააკავა, კერძოდ კი, პოლიციის შენობისთვის ე.წ. სტიკერის გაკვრაზე.
როგორც კორძაიამ აღნიშნა, ამ სტიკერის გაკვრით პოლიციის შენობის იერ-სახე არ დამახინჯებულა.
„ჩვენ ამ პროცესზე არ ვაპირებთ საუბარს იმაზე, მზია ამაღლობელი დამნაშავეა თუ არა იმ ბრალდებაში, რაშიც სისხლის სამართლის წესით ედავება მას პროკურატურა, მაგრამ მე მინდა მკაფიოდ ვთქვა, რომ მზია ამაღლობელი აღკვეთის ღონისძიების სახით არ იმსახურებს პატიმრობას. ერთადერთი, რის გამოც მზია ამაღლობელი დღეს არის წინასწარ პატიმრობაში, ეს არის ზუსტად ის, რომ მოსამართლემ, ამ ადმინისტრაციულ სამართალდარღვევის გამო ჩათვალა, რომ ის დანაშაულს კიდევ ჩაიდენს. პირადად ჩემთვის, როგორც მზიას ადვოკატისთვის ეს პროცესი გარკვეულწილად უფრო მნიშვნელოვანია, ვიდრე სისხლის სამართლის საქმე იმიტომ, რომ ამ პროცესში მტკიცებულებებში უფრო მეტი სიყალბეა. მადლობა თქვენ, რომ იმ მოსამართლისგან განსხვავებით მოწმეები დაუშვით და იმედი მაქვს, რომ მოწმეები თავიანთი ჩვენებებით ამ ოქმებს გააქარწყლებენ. ამ ოქმიდან გამომდინარე მათ სურთ, რომ მზია ამაღლობელი დატოვონ წინასწარ პატიმრობაში. მე არ ვლაპარაკობ სისხლის სამართლის ბრალდების კანონიერებაზე, მაგრამ თქვენ გადაწყვეტილებაზეა დამოკიდებული აღკვეთის ღონისძიება შეიცვლება თუ არა საქმეზე“, - მიმართა მოსამართლეს თამარ კორძაიამ.
ამასთან, როგორც საია-ს თავმჯდომარემ, ნონა ქურდოვანიძემ განაცხადა, მზია ამაღლობელი დააკავეს შენობის გარეთ, სტიკერის გაკვრის დროს და ის შენობაში შემდგომ შეიყვანეს.
„მათ აქვთ მცდელობა, თქვან, თითქოს, მზია მანამდე დაკავებული არ იყო, უბრალოდ შეიყვანეს შენობაში, შემდეგ შენობაში აგრძელებდა შეურაცხყოფას და იმიტომ დააკავეს“, - განაცხადა ნონა ქურდოვანიძემ.
