ამერიკის შეერთებული შტატები რუსეთ-უკრაინის ომის დასრულების მოლაპარაკებებს დატოვებს, თუ რუსეთის ფედერაცია და უკრაინა პროგრესს არ აჩვენებენ, - ამის შესახებ აშშ-ის სახელმწიფო დეპარტამენტის პრესსპიკერმა, ტემი ბრიუსმა სახელმწიფო მდივნის, მარკო რუბიოს სიტყვების ციტირებისას განაცხადა.
„შემიძლია გითხრათ რაღაც, რაც სახელმწიფო მდივანმა ცოტა ხნის წინ მითხრა სიტუაციის შესახებ. ჩვენ ახლა იმ ეტაპზე ვართ, როდესაც ორივე მხარემ უნდა წარმოადგინოს კონკრეტული წინადადებები იმის შესახებ, თუ როგორ უნდა დასრულდეს ეს კონფლიქტი. ჩვენი შემდგომი ქმედებები ახლა პრეზიდენტის გადასაწყვეტია. თუ პროგრესი არ იქნება, ჩვენ, როგორც მედიატორები, ამ პროცესში უკან დავიხევთ“, - აღნიშნა ტემი ბრიუსმა.
მისი თქმით, თეთრი სახლი სრული და არა სამდღიანი ცეცხლის შეწყვეტის მომხრეა.
