ე.წ ბორჯომის ვაგზლის მიმდებარედ, გუშინ გაჩენილი ხანძრის შედეგად დაზარალებული მოვაჭრეები გადამწვარი ბაზრობის ტერიტორიაზე შეშვებას ითხოვენ.
TV პირველის ინფორმაციით, ე.წ. ბორჯომის ბაზარში დასაქმებულებს აქვთ ეჭვი, რომ ის საქონელი, რაც საწყობში დაწვას გადაურჩა, უცნობმა პირებმა მოიპარეს. ამასთან, რამდენიმე მოვაჭრემ ადგილზე პოლიციის კორდონის გარღვევა შეძლო და დამწვარი ბაზრის ტერიტორიაზე შევიდა, თუმცა ისინი პოლიციის წარმომადგენლებმა ძალის გამოყენებით გამოიყვანეს.
"ჯერ გაქურდეს, დაბომბეს ადგილები და დაწვეს, ვნახე, ადგილზე არ არის საქონელი, საწყობები ცარიელია, ქაღალდის ყუთი არ დაიწვა?! "- აცხადებენ მოვაჭრეები.
აღსანიშნავია, რომ ბორჯომის ბაზრობის ტერიტორიაზე პოლიციის ცოცხალი კედელი და რკინის ჯებირების მობილიზებაა. ადგილზე შპს "ბაქანის” დირექტორი და 35%-იანი წილის მფლობელი თორნიკე წერეთელი მოვიდა, თუმცა ის ამბობს, რომ გამოძიების დასრულებას ელოდება.
ცნობისთვის, ე.წ. ბორჯომის ბაზრის ტერიტორიაზე გაჩენილი ხანძრის შედეგად 15 ათასამდე კვადრატული მეტრია დამწვარი. ხანძრის გამომწვევი მიზეზები ჯერჯერობით უცნობია, თუმცა მოვაჭრეების განცხადებით, არსებობს გონივრული ეჭვი, რომლის მიხედვითაც, ბაზრის გადაწვა კერძო ინტერესს უკავშირდება. უფრო კონკრეტულად, ხანძრამდე რამდენიმე დღით ადრე, ბაზრის ტერიტორიაზე მოვაჭრეებმა უცნობი პირი ადმინისტრაციის წარმომადგენლებთან ერთად დააფიქსირეს, რომელიც ტერიტორიას ფოტოს უღებდა.
