ჯგუფური ძალადობის ორგანიზების და მასში მონაწილეობის ბრალდებით დაკავებულებს სასამართლოზე მიტანილი აქვთ ფურცლები წარწერებით: „FREE JAFARA“, „არც შეწყალება“, „არც საპროცესო“, "დასანქცირდეს თვითმარქვია მიხეილ ყაველაშვილი"

„FREE JAFARA“, „არც შეწყალება“, „არც საპროცესო“, "დასანქცირდეს თვითმარქვია მიხეილ ყაველაშვილი", - ამ წარწერებით ფურცლები სასამართლო პროცესზე პარლამენტთან მიმდინარე საპროტესტო აქციების დროს ჯგუფური ძალადობის ორგანიზების და მასში მონაწილეობის ბრალდებით დაკავებულ პირებს აქვთ მოტანილი.

სხდომა თბილისის საქალაქო სასამართლოში ამ წუთებში მიმდინარეობს და ჩვენებას დაზარალებული პოლიციელი გრიგოლ ჭანტურიძე აძლევს.

მისი ჩვენების მიხედვით, საპროტესტო აქციაზე, რომელიც თავიდან მშვიდ ვითარებაში მიმდინარეობდა, შემდეგ კი ვითარება დაიძაბა, აქციის მოანწილეების მიერ ნასროლი ქვა სახის არეში მოხვდა და მიიღო დაზიანება. ჭანტურიძის თქმით, მას ერთი ქირურგიული ოპერაცია ჩაუტარდა, მეორე კი გასაკეთებელი აქვს.

სახელმწიფო ბრალდებას სასამართლოში დღეს საერთო ჯამში 4 მოწმე ეყოლება წარმოდგენილი.

ცნობისთვის, დაკავებულებიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.

ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.