ჩემი მოტაცების შემდეგ გავიდა 3 კვირა. ამ ხნის განმავლობაში არცერთი მოქმედება არ ჩატარებულა. არ ვარ დაზარალებულად ცნობილი და არც არავინ დაკითხულა. მაინტერესებს, სასამართლომ რამე რეაგირება მოახდინა თუ არა? - ამ კითხვით მიმართა თბილისის საქალაქო სასამართლოში მიმდინარე პროცესზე, „თანაინვესტირების ფონდის“ ყოფილმა გენერალურმა დირექტორმა, გიორგი ბაჩიაშვილმა მოსამართლე ჯვებე ნაჭყებიას.
„1 კაცის ჩვენებაზე 11 წელი მაქვს მისჯილი. ჩემ საქმეზე დევს 2 უტყუარი მტკიცებულება. რა რეაგირება მოხდა და არის თუ არა მოსამართლისთვის რამე ცნობილი?“ - განაცხადა ბაჩიაშვილმა.
ამასთან დაკავშირებით მოსამართლემ ბაჩიაშვილს ასე უპასუხა:
„ამ პროცესზე თქვენი არც ერთი უფლება არ დაირღვევა. ამაზე ვაგებ პასუხს. დღევანდელ პროცესზე , რაც მე მეხება, არის საზღვრის უკანონო კვეთა. რაც შეეხება სხვა საქმეებს, მოსამართლე პასუხს ვერ აგებს იმ საქმეზე, რომლის განხილვაც მას არ ეხება“, - განაცხადა ჯვებე ნაჭყებიამ.
თავის მხრივ, ბაჩიაშვილმა აღნიშნა, რომ დღევანდელ სასამართლოს ვერ ენდობა.
„არ აქვს ჩემს არც ერთ პროცესში მონაწილეობას აზრი. როგორ უნდა ვენდო [სასამართლოს]?“, - განაცხადა ბაჩიაშვილმა.
თბილისის საქალაქო სასამართლოში, გიორგი ბაჩიაშვილს სასამართლო პროცესი, ამ წუთებში საქართველოს სახელმწიფო საზღვრის უკანონოდ კვეთის საქმეზე იმართება.
IPN
