კრაინის პრეზიდენტმა, ვოლოდიმირ ზელენსკიმ აშშ-ის პრეზიდენტი დონალდ ტრამპი ირანის მიმართ „გადამწყვეტობი ქმედებებისთვის“ შეაქო. ზელენსკიმ აშშ-ის მიერ ირანის ბირთვულ ობიექტებზე დარტყმების შემდეგ განაცხადა, რომ თანამედროვე სამყაროში ბირთვული იარაღის გავრცელება არ უნდა მოხდეს.
„დღეს გავრცელდა ინფორმაცია ახლო აღმოსავლეთში არსებული ვითარების შესახებ – აშშ-ის მიერ ირანის რეჟიმის ბირთვულ ობიექტებზე დარტყმების შემდეგ. რეჟიმი, რომელიც ასე ძალიან დაეხმარა პუტინს. ახლა უკრაინის ცაში „შაჰედების“ მეტი ტალღაა. ყველას კარგად გვახსოვს, საიდან მიიღო რუსეთმა ეს იარაღი. ირანის გადაწყვეტილებებმა რუსეთის დახმარების შესახებ ჩვენს ქვეყანას და ბევრ სხვა ქვეყანას მასშტაბური განადგურება, მასშტაბური ადამიანური დანაკარგები მოუტანა და ეს ნამდვილად უნდა შეწყდეს. ეს ნამდვილად არ უნდა გაძლიერდეს ბირთვული იარაღით. თანამედროვე სამყაროში ბირთვული იარაღის გავრცელება არ უნდა მოხდეს. მნიშვნელოვანია, რომ ამ საკითხში არსებობს ამერიკის მტკიცე გადაწყვეტილება – პრეზიდენტ ტრამპის მტკიცე გადაწყვეტილება“, – განაცხადა ზელენსკიმ.
ამასთან, უკრაინის პრეზიდენტმა ხაზგასმით აღნიშნა, რომ დიპლომატიამ ყველგან უნდა იმუშაოს.
„დიპლომატიამ ყველგან უნდა იმუშაოს. თუ პუტინი უარყოფს ყველა სამშვიდობო წინადადებას, მათ შორის ამერიკულს, მაშინ გასაკვირი არ არის, რომ ისინი თეირანშიც უარყოფენ. თუმცა, ყველამ უნდა იგრძნოს, რა არის საერთაშორისო სოლიდარობის ძალა და ტერორის ნებისმიერი გავრცელების დაუშვებლობა“, – განაცხადა ზელენსკიმ.
