რვა პოლიტიკური პარტია გადაწყვეტილად აპირებს, ბოიკოტი გამოუცხადოს არჩევნებს, მაგრამ რა გზით მივლენ ისინი ივანიშვილის მოძალადე რეჟიმის დამარცხებამდე, გზა და ალტერნატიული გეგმა არ არსებობს. ყოველ შემთხვევაში, მე ვერ გავიგე, – ამის შესახებ პარტია „გახარია საქართველოსთვის“ პოლიტიკური საბჭოს წევრმა, გიორგი შარაშიძემ განაცხადა.
მისი თქმით, პარტია „გახარია საქართველოსთვის“ გადაწყვეტილებას არ ცვლის.
„ჩვენ გადაწყვეტილებებს არ ვცვლით. ვინც იცნობს ჩვენი პარტიის თანმიმდევრულობას, არავის უნდა ჰქონოდა მოლოდინი, რომ ამ გადაწყვეტილებას შევცვლიდით. ვერ დავეთანხმები იმ მოსაზრებას, რომ არჩევნებში მონაწილეობა დღეს არის რაიმე ფორმით თანამშრომლობა „ქართულ ოცნებასთან“. სრულიად საპირისპირო რეალობასთან გვაქვს საქმე“, – განაცხადა შარაშიძემ „პალიტრანიუსის“ ეთერში.
რვა ოპოზიციურმა პარტიამ განაცხადა, რომ უარს ამბობს ადგილობრივ არჩევნებში მონაწილეობაზე, რის შემდეგაც ელენე ხოშტარიამ და გედევან ფოფხაძემ შიმშილობა შეწყვიტეს.
