აშშ-ის პრეზიდენტი დონალდ ტრამპი აშშ-სა და ნატო-ს შორის უკრაინისთვის იარაღის მიწოდების შესახებ მიღწეული შეთანხმებით კმაყოფილია. ამის შესახებ ტრამპმა ვაშინგტონში, ხელოვნური ინტელექტის კონფერენციაზე სიტყვით გამოსვლისას განაცხადა.
კერძოდ, საუბარია შეთანხმებაზე, რომლის თანახმადაც, ნატო-ს წევრი ევროპელი მოკავშირეები აშშ-სგან შეიძენენ იარაღს და უკრაინას გაუგზავნიან.
„ისინი შეერთებულ შტატებს გადაუხდიან სამხედრო აღჭურვილობის ღირებულების 100%-ს და მისი დიდი ნაწილი უკრაინაში წავა“, – განაცხადა ტრამპმა.
ამავდროულად, აშშ-ის სახელმწიფო დეპარტამენტმა უკრაინისთვის 172 მილიონი დოლარის ღირებულების HAWK Phase III სარაკეტო სისტემების და 150 მილიონი დოლარის ღირებულების Bradley საბრძოლო მანქანების მიწოდება დაამტკიცა. ინფორმაციას აშშ-ის თავდაცვითი უსაფრთხოების თანამშრომლობის სააგენტო ავრცელებს.
სააგენტოს ვებგვერდზე გამოქვეყნებული ინფორმაციით, Hawk რაკეტების მთავარი კონტრაქტორები Sielman Corp და RTX Corp არიან, ხოლო Bradley რაკეტების მთავარი კონტრაქტორები BAE Systems, Leonardo DRS Inc და Renk Group AG არიან.
როგორც აშშ-ის თავდაცვითი უსაფრთხოების თანამშრომლობის სააგენტოს ინფორმაციაშია აღნიშნული, ორივე ტიპის იარაღი უკვე მიეწოდება უკრაინას.
