აშშ-ის სახდეპის პრესსპიკერი - დონალდ ტრამპის მოთმინება ზოგიერთმა ადამიანმა არასწორად აღიქვა
30.07.2025 ნახვები: 362
დონალდ ტრამპის მოთმინება ზოგიერთმა ადამიანმა არასწორად აღიქვა, - ამის შესახებ აშშ-ის სახელმწიფო დეპარტამენტის პრესსპიკერმა, ტემი ბრიუსმა განაცხადა.
ტემი ბრიუსი აშშ-ის პრეზიდენტის, დონალდ ტრამპის მიერ უკრაინაში მშვიდობის მისაღწევად რუსეთისთვის დაწესებული საბოლოო ვადის 10 დღემდე შემცირებას გამოეხმაურა.
„ის [დონალდ ტრამპი] მომთმენი იყო და ეს, ალბათ, ზოგიერთმა ადამიანმა არასწორად აღიქვა. ვფიქრობ, არასწორი ინტერპრეტაციების დრო გავიდა“, - განაცხადა ტემი ბრიუსმა.
მისი თქმით, რუსეთის წინააღმდეგ მეორადი სანქციების დაწესება დონალდ ტრამპის უფლებამოსილების ნაწილია.
„პრეზიდენტმა ტრამპმა დაამტკიცა, რომ მას სერიოზულად უნდა მოეკიდონ, რადგან ის სერიოზული ადამიანია და ამის შედეგებს მთელ მსოფლიოში ვხედავთ. პრეზიდენტი არ არის ადამიანი, რომელიც გადაწყვეტილებებს ნაჩქარევად იღებს. ცხადია, ეს თავიდანვე განიხილებოდა და ჩვენ მზად ვართ გავაკეთოთ ის, რაც აუცილებელია“, - აღნიშნა აშშ-ის სახელმწიფო დეპარტამენტის პრესსპიკერმა.
